27 ലക്ഷം വിദ്യാർഥികളുടെ 'സമ്പൂർണ' എൻട്രി പൂർത്തിയായി

തിരുവനന്തപുരം: സ്കൂളുകളിൽ 27 ലക്ഷം വിദ്യാർഥികളുടെ വിവരം സമ്പൂർണ സോഫ്റ്റ്വെയറിൽ രേഖപ്പെടുത്തി. ഇതിൽ ഒന്നര ലക്ഷത്തോളം ഇൗ വർഷം ഒന്നാം ക്ലാസിൽ പ്രവേശനം നേടിയവരുടേതാണ്. അന്തിമകണക്ക് ആറാം പ്രവൃത്തിദിനമായ ജൂൺ എട്ടിന് സമർപ്പിക്കും. സ്കൂളുകളിൽ 37 ലക്ഷം വിദ്യാർഥികൾ എത്തിയിട്ടുണ്ടാകുമെന്നാണ് കണക്കുകൂട്ടൽ. കഴിഞ്ഞ വർഷം ഒന്ന് മുതൽ പത്ത് വരെ ക്ലാസിൽ 36,80,742 കുട്ടികളാണ് സ്കൂളുകളിലുണ്ടായിരുന്നത്. ഇതിൽ 3,16,023 പേർ ഒന്നാം ക്ലാസിലായിരുന്നു. സ്കൂളുകളിൽ കുട്ടികളുടെ ക്ലാസ്കയറ്റം നടന്നത് മുതൽ വിവരം 'സമ്പൂർണ'യിൽ പ്രധാനാധ്യാപകർ ചേർത്തുവരുകയാണ്. കോഴിക്കോട്, മലപ്പുറം ജില്ലകളിൽ സ്കൂളുകൾ തുറക്കുന്നതോടെയേ ഒന്നാം ക്ലാസിലെ കുട്ടികളുടെ യഥാർഥ എണ്ണം പുറത്തുവരൂ.