സര്‍ക്കാര്‍ ഓഫിസുകള്‍ക്ക് ജൂണ്‍ അഞ്ചുമുതല്‍ ഹരിതചട്ടം

കൊല്ലം: ആരോഗ്യ ജാഗ്രതാ പരിപാടിയുടെ ഭാഗമായി ജില്ലയിലെ എല്ലാ സര്‍ക്കാര്‍ ഓഫിസുകളും ഇൗമാസം അഞ്ച് മുതല്‍ ഹരിതചട്ടം പാലിക്കണമെന്ന് കലക്ടര്‍ ഡോ. എസ്. കാര്‍ത്തികേയന്‍ നിര്‍ദേശിച്ചു. ഇതിന് മുന്നോടിയായി ശനിയാഴ്ച ഓഫിസുകളും പരിസരവും ശുചീകരിച്ച് ഹരിതചട്ട നിര്‍ദേശങ്ങള്‍ അടങ്ങിയ ബോര്‍ഡുകള്‍ സ്ഥാപിക്കണമെന്നും കലക്‌ടറേറ്റില്‍ ചേര്‍ന്ന ആലോചനയോഗത്തില്‍ അദ്ദേഹം അറിയിച്ചു. ഹരിതചട്ടം പാലിക്കാതിരിക്കുകയോ കൊതുകുകളുടെ ഉറവിടങ്ങള്‍ കണ്ടെത്തുകയോ ചെയ്താല്‍ ഓഫിസ് മേധാവിക്കെതിരെ പിഴശിക്ഷ ഉള്‍പ്പെടെയുള്ള നടപടികള്‍ സ്വീകരിക്കും. ഞായറാഴ്ച ജില്ലയിലെ എല്ലാ പൊതുസ്ഥലങ്ങളും വീടുകളും പൊതുജന സഹകരണത്തോടെ ശുചീകരിക്കണം. റേഷന്‍ കാര്‍ഡ് വിതരണം; തീയതി മാറ്റി കൊല്ലം: പുതിയ റേഷന്‍ കാര്‍ഡുകളുടെ വിതരണ തീയതി മാറ്റിയതായി ജില്ലാ സപ്ലൈ ഓഫിസര്‍ അറിയിച്ചു. കാര്‍ഡുകളുടെ അച്ചടി പൂര്‍ത്തിയാകാത്ത സാഹചര്യത്തിലാണിത്. ജൂണ്‍ മൂന്നിന് റേഷന്‍ കടകള്‍ക്ക് പ്രവൃത്തിദിവസമായിരിക്കുമെന്നും ഡി.എസ്.ഒ അറിയിച്ചു.