ഉദാര പരോള്‍ രാഷ്​ട്രീയ കൊലപാതകങ്ങള്‍ക്ക് പ്രോത്സാഹനമാകും -ജി. ദേവരാജന്‍

കൊല്ലം: രാഷ്ട്രീയ കൊലപാതകങ്ങളിൽ ശിക്ഷ വാങ്ങി ജയിലില്‍ കഴിയുന്നവര്‍ക്ക് രാഷ്ട്രീയ ചായ്‌വ് നോക്കി അനിയന്ത്രിതമായി പരോള്‍ അനുവദിക്കുന്നത് അധാര്‍മികവും നിയമവാഴ്ചയോടുള്ള വെല്ലുവിളിയുമാണെന്ന് ഫോര്‍വേഡ് ബ്ലോക്ക് ദേശീയ സെക്രട്ടറി ജി. ദേവരാജന്‍. ഇത് രാഷ്ട്രീയകൊലപാതകങ്ങള്‍ക്ക് പ്രോത്സാഹനമാകും. എത്ര നിഷ്ഠുരമായി കൊല ചെയ്താലും പാര്‍ട്ടി സംരക്ഷിക്കുമെന്നും ജയിലില്‍ സർവ സുഖസൗകര്യങ്ങളും ഭരണകൂടം ഏര്‍പ്പെടുത്തി നല്‍കുമെന്നും വരുന്നത് ക്രിമിനലുകളെ സംരക്ഷിക്കുന്ന നടപടിയാണ്. രാഷ്ട്രീയ കൊലപാതകങ്ങളില്‍ ജയിലില്‍ കഴിയുന്നവര്‍ക്ക് കഴിഞ്ഞ വര്‍ഷങ്ങളില്‍ നല്‍കിയ പരോൾ സംബന്ധിച്ച് വകുപ്പുതല അന്വേഷണം നടത്തണമെന്നും അദ്ദേഹം പ്രസ്താവനയിൽ ആവശ്യപ്പെട്ടു.