യു.എൻ.എ സെക്ര​േട്ടറിയറ്റ്​ മാർച്ച്​ നടത്തി​ കെ.വി.എം ആശുപത്രി സമരം ഒത്തുതീർപ്പാക്കണമെന്നാവശ്യം

തിരുവനന്തപുരം: ചേർത്തല കെ.വി.എം ആശുപത്രിയിൽ നഴ്സുമാർ നടത്തിവരുന്ന സമരം ഒത്തുതീർപ്പാക്കുക, ശമ്പളപരിഷ്കരണം നടപ്പാക്കുക, ട്രെയിനിങ് സമ്പ്രദായം നിർത്തലാക്കുക എന്നീ ആവശ്യങ്ങൾ ഉന്നയിച്ച് യുനൈറ്റഡ് നഴ്സസ് അസോസിയേഷൻ (യു.എൻ.എ) ജില്ല കമ്മിറ്റി സെക്രേട്ടറിയറ്റ് മാർച്ച് സംഘടിപ്പിച്ചു. നൂറുകണക്കിന് നഴ്സുമാർ പ്രകടനത്തിൽ അണിനിരന്നു. സംസ്ഥാന വൈസ് പ്രസിഡൻറ് സിബി മുകേഷ് ഉദ്ഘാടനം ചെയ്തു. കെ.വി.എം ആശുപത്രി സമരം ഒത്തുതീർത്തില്ലെങ്കിൽ സംസ്ഥാന വ്യാപകമായി നഴ്സുമാർ സമരം ആരംഭിക്കുമെന്ന് അദ്ദേഹം പറഞ്ഞു. ശമ്പളവും മറ്റ് ആനൂകൂല്യങ്ങളും നി‌ഷേധിക്കപ്പെടുകയാണ്. നടപടി സ്വീകരിക്കേണ്ട സർക്കാർ നോക്കുകുത്തിയായി മാറി. മറ്റു മേഖലകളിൽ ശമ്പളപരിഷ്കരണം നടപ്പാക്കിയെങ്കിലും നഴ്സുമാർക്ക് ഇപ്പോഴും ഇത് അകലെയാണ്. ശമ്പള പരിഷ്കരണം അടിയന്തരമായി നടപ്പാക്കാൻ സർക്കാർ തയാറാകണമെന്നും അദ്ദേഹം ആവശ്യപ്പെട്ടു. ജില്ല സെക്രട്ടറി ബി.എസ്. സുബി, പ്രസിഡൻറ് രാജേഷ്, നേതാക്കളായ മുഹമ്മദ്, രാഹുൽ, ഹാരിസൺ എന്നിവർ സംസാരിച്ചു.