അഗസ്ത്യാർകൂടത്തിൽ തീർഥാടനം: ഗോത്രാചാര പൂജകൾ 14ന് തുടങ്ങും

കാട്ടാക്കട: അഗസ്ത്യാർകൂടത്തിൽ തീർഥാടന കാലത്തെ ഗോത്രാചാര പൂജകൾ 14ന് തുടങ്ങുമെന്ന് അഗസ്ത്യാർകൂടം ക്ഷേത്ര കാണിക്കാർ ട്രസ്റ്റ് വാർത്താസമ്മേളനത്തിൽ അറിയിച്ചു. മുഖ്യപൂജാരി ഭഗവാൻ കാണിയുൾപ്പെടുന്ന 13 അംഗ സംഘമാണ് പൂജകൾ നടത്തുക. സമാപന ദിവസമായ 31വരെ ദിവസവും രാവിലെ ആറ് മുതൽ വൈകീട്ട് നാല് വരെ അഗസ്ത്യസന്നിധിയിലും അതിരുമല ദേവസ്ഥാനത്ത് വൈകീട്ട് ഏഴ് വരെയുമാണ് പൂജകൾ. ഈ വര്‍ഷം തീര്‍ഥാടന കാലം ശിവരാത്രി വരെയുള്ള 31 ദിവസം മാത്രമേ ഉണ്ടായിരിക്കൂ. മുന്‍ വര്‍ഷങ്ങളെക്കാള്‍ കുറവാണ് ഇത്. കുംഭ ഘോഷയാത്ര, ചാറ്റ് എന്നിവയും ഉണ്ടാവുമെന്ന് ട്രസ്റ്റ് ഭാരവാഹികളായ മോഹനൻ ത്രിവേണി, എം.ആർ. സുരേഷ്, ക്ഷേത്ര മുഖ്യ പൂജാരി ഭഗവാന്‍ കാണി എന്നിവര്‍ പറഞ്ഞു.