ടെൻഡർ ഈ മാസം അവസാനത്തോടെ

നേമം: കരമന-കളിയിക്കാവിള പാതയുടെ പ്രാവച്ചമ്പലം മുതൽ ബാലരാമപുരം വരെയുള്ള രണ്ടാം ഘട്ടത്തി​െൻറ നിർമാണത്തിനായുള്ള ടെൻഡർ ഈ മാസാവസാനത്തോടെയുണ്ടാവുമെന്ന് പാത വികസന ആക്ഷൻ കൗൺസിലിന് ദേശീയപാത വകുപ്പ് അധികൃതർ ഉറപ്പുനൽകി. രണ്ടാം ഘട്ടത്തിൽ അവശേഷിക്കുന്ന ബാലരാമപുരം- വഴിമുക്ക് പ്രദേശത്ത് ഇപ്പോൾ നടക്കുന്ന സാമുഹിക ആഘാത പഠനം പൂർത്തിയായി റിപ്പോർട്ട് ലഭിക്കുന്ന മുറക്ക് ആ ഭാഗത്തെ പാത നിർമാണവും നടത്തും. വഴിമുക്ക് മുതൽ കളിയിക്കാവിള വരെയുള്ള അവസാന ഭാഗത്തെ അലൈൻമ​െൻറ് പൊതുമരാമത്ത് ഡിസൈൻ വിഭാഗം ഏറക്കുറെ തയാറാക്കിക്കഴിഞ്ഞു. സർക്കാർ അംഗീകാരം ലഭിച്ചാൽ അലൈൻമ​െൻറ് പ്രസിദ്ധീകരിക്കും. കിഫ്ബി യുടെ പദ്ധതിയിൽ ഉൾപ്പെടുത്തിയാണ് പാത നിർമാണം നടത്തുക. പ്രാവച്ചമ്പലത്ത് പഴയ രാജപാതയിൽ സർക്കാർ സ്ഥലത്ത് താമസിക്കുന്ന 22 കുടുംബങ്ങളെ മാറ്റിപ്പാർപ്പിക്കേണ്ടതുണ്ട്. ഇക്കാര്യത്തിൽ അടിയന്തര നടപടി സ്വീകരിക്കാൻ ദേശീയപാത വിഭാഗം കലക്ടറോട് ആവശ്യപ്പെട്ടിട്ടുണ്ട്. കരമന--കളിയിക്കാവിള പാത വികസന ആക്ഷൻ കൗൺസിൽ പ്രസിഡൻറ് എ.എസ്. മോഹൻകുമാർ, ഭാരവാഹികളായ ആർ.എസ്. ശശികുമാർ, എസ്.കെ. ജയകുമാർ, മണ്ണാങ്കൽ രാമചന്ദ്രൻ, എസ്.എസ്. ലളിത് എന്നിവരാണ് പ്രതിനിധി സംഘത്തിൽ ഉണ്ടായിരുന്നത്.