നേമത്ത് ഇടതിനെതിരെയുള്ള കോൺഗ്രസ് അവിശ്വാസം പരാജയപ്പെട്ടു

മലയിൻകീഴ്: നേമം ബ്ലോക്ക് പഞ്ചായത്ത് ഇടത് ഭരണസമിതിക്കെതിരെയുള്ള കോൺഗ്രസ് അവിശ്വാസ പ്രമേയം പരാജയപ്പെട്ടു. സി.പി.എം പ്രതിനിധിയായ പ്രസിഡൻറ് എൽ. ശകുന്തളകുമാരിക്കെതിരെയുള്ള അവിശ്വാസം രാവിലെ 11നും വൈസ് പ്രസിഡൻറ് സി.പി.ഐയുടെ വിളപ്പിൽ രാധാകൃഷ്ണനെതിരെയുള്ള അവിശ്വാസം ഉച്ചക്ക് രണ്ടിനുമാണ് പരിഗണിച്ചത്. 16 അംഗ ബ്ലോക്ക് പഞ്ചായത്തിൽ കോൺഗ്രസ് ഏഴ്, സി.പി.എം ആറ്, സി.പി.ഐ ഒന്ന്, ബി.ജെ.പി രണ്ട് എന്നിങ്ങനെയാണ് കക്ഷിനില. ഇതിൽ കോൺഗ്രസി​െൻറ എഴുപേർ മാത്രമേ അവിശ്വാസ പ്രമേയ ചർച്ചയിൽ പങ്കെടുത്തുള്ളൂ. തുടർന്ന്, വരണാധികാരിയായ ജില്ല പഞ്ചായത്ത് സെക്രട്ടറി സുഭാഷ് ക്വോറം ഇല്ലാത്തതിനാൽ ചർച്ചക്കെടുക്കാതെ അവിശ്വാസം തള്ളുകയായിരുന്നു. ബി.ജെ.പി അംഗങ്ങൾ വിട്ടുനിന്നു. കോൺഗ്രസ്, ഇടത് കക്ഷിനില തുല്യമായതിനാൽ നറുക്കെടുപ്പിലൂടെയാണ് കഴിഞ്ഞ രണ്ട് തവണയും പ്രസിഡൻറ്, വൈസ് പ്രസിഡൻറ് തെരഞ്ഞെടുപ്പുകൾ നടന്നിരുന്നത്. ഓരോ ആറു മാസം പിന്നിടുമ്പോഴും പ്രതിപക്ഷത്തിരിക്കുന്നവർ അവിശ്വാസവുമായി വരുകയാണ് പതിവ്. കഴിഞ്ഞ 22നാണ് പ്രസിഡൻറിനെതിരെ കോൺഗ്രസിലെ മായാരാജേന്ദ്രനും വൈസ് പ്രസിഡൻറിനെതിരെ കോൺഗ്രസിലെ തന്നെ എസ്. വീരേന്ദ്രകുമാറും ജില്ല പഞ്ചായത്ത് സെക്രട്ടറിക്ക് അവിശ്വാസ നോട്ടീസ് നൽകിയത്.