വിവാഹചടങ്ങിനെ ചൊല്ലി സസ്​പെൻഷൻ; പിൻവലിക്കാൻ ജമാഅത്ത് കമ്മിറ്റിക്ക് വനിത കമീഷൻ നിർദേശം

തിരുവനന്തപുരം: വിവാഹ ചടങ്ങുമായി ബന്ധപ്പെട്ട് വധു ഉൾപ്പെട്ട കുടുംബങ്ങളെ സസ്പെൻഡ് ചെയ്തത് പിൻവലിക്കണമെന്ന് ജമാഅത്ത് കമ്മിറ്റിക്ക് വനിത കമീഷൻ നിർദേശം. മതപരമായ ചടങ്ങുകൾക്ക് വിരുദ്ധമായി വിവാഹം നടത്തിയെന്നാരോപിച്ച് വിവാഹം രജിസ്റ്റർ ചെയ്യാൻ വിസ്സമ്മതിക്കുകയും ശിക്ഷണ നടപടി സ്വീകരിക്കുകയും ചെയ്ത കണിയാപുരം മുസ്ലിം ജമാഅത്ത് കമ്മിറ്റിയോടാണ് നടപടി പിൻവലിക്കാൻ വനിത കമീഷനംഗം എം.എസ്. താര നിർദേശം നൽകിയത്. ഒരാഴ്ചക്കുള്ളിൽ തീരുമാനം നടപ്പാക്കിയില്ലെങ്കിൽ ജമാഅത്ത് കമ്മിറ്റിക്കെതിരെ നിയമാനുസൃത നടപടിക്കായി ശിപാർശചെയ്യുമെന്ന് കമീഷനംഗം വ്യക്തമാക്കി.