റോളർ സ്‌കേറ്റിങ് പരിശീലകർക്ക്​ പഠന പരിപാടി

തിരുവനന്തപുരം: കേരളത്തിലെ റോളർ സ്‌കേറ്റിങ് പരിശീലകർക്ക് മൂന്ന് ദിവസത്തെ ഓറിയേൻറഷൻ പരിപാടി സായി എൽ.എൻ.സി.പി.ഇയിൽ നടന്നു. കേരള റോളർ സ്‌കേറ്റിങ് അസോസിയേഷനുമായി ചേർന്നാണ് പരിപാടി സംഘടിപ്പിച്ചത്. വിവിധ ജില്ലകളിൽനിന്നുള്ള 18 പേരാണ് പങ്കെടുത്തത്. ഏഷ്യൻ ഗെയിംസിലും ഒളിമ്പിക്സിലും മത്സര ഇനമായി റോളർ സ്‌കേറ്റിങ് ഉൾപ്പെടുത്തിക്കഴിഞ്ഞ സാഹചര്യത്തിൽ പരിശീലകർക്ക് ശാസ്ത്രീയമായ അറിവ് അനിവാര്യമാണെന്ന് പരിപാടി ഉദ്ഘാടനം ചെയ്ത എൽ.എൻ.സി.പി.ഇ പ്രിൻസിപ്പൽ ഡോ. ജി. കിഷോർ പറഞ്ഞു. അസോസിയേഷൻ വൈസ് പ്രസിഡൻറ് വെങ്കിട്ട നാരായണൻ, സെക്രട്ടറി സെബാസ്റ്റ്യൻ പ്രേം എന്നിവർ സംസാരിച്ചു. സ്പോർട്സ് മെഡിസിൻ, സ്പോർട്സ് സൈക്കോളജി, സ്പോർട്സ് മെതേഡോളജി തുടങ്ങിയ വിഷയങ്ങളിൽ വിദഗ്ധരായ അധ്യാപകർ ക്ലാസുകൾക്ക് നേതൃത്വം നൽകി.