മുൻ പൊലീസ് ഉദ്യോഗസ്​ഥ​െൻറ വീട്ടില്‍നിന്ന്​ സ്വർണാഭരണങ്ങള്‍ കവര്‍ന്നു

വട്ടിയൂര്‍ക്കാവ്: മുൻ പൊലീസ് ഉദ്യോഗസ്ഥ​െൻറ വീട്ടില്‍നിന്ന് പതിനാറ് പവന്‍ സ്വർണാഭരണങ്ങള്‍ കവര്‍ന്നു. വട്ടിയൂര്‍ക്കാവ് സെന്‍ട്രല്‍ പോളിടെക്നിക്കിന് എതിര്‍വശം ടി.സി 10/2010ല്‍ അശ്വതിയില്‍ രവീന്ദ്രന്‍ നായരുടെ വീട്ടില്‍നിന്നാണ് ആഭരണങ്ങള്‍ കളവുപോയത്. എ.ആര്‍ ക്യാമ്പിലെ അസിസ്റ്റൻറ് കമാണ്ടൻറായിരുന്നു ഇദ്ദേഹം. രണ്ടുനിലയുള്ള വീട്ടില്‍ മുകൾനിലയില്‍ ഇദ്ദേഹവും ഭാര്യയുമാണ് താമസം. മകള്‍ ദേവികയും ഭര്‍ത്താവ് അജിത്‌ കുമാറും താമസിക്കുന്ന വീടി​െൻറ താഴത്തെനിലയില്‍ സൂക്ഷിച്ചിരുന്ന സ്വർണാഭരണങ്ങളാണ് മോഷണം പോയത്. അടുക്കളക്ക് സമീപത്തെ മുറിയിലെ അലമാരയിലെ ലോക്കറില്‍ സൂക്ഷിച്ചിരുന്ന ആറുപവന്‍ തൂക്കം വരുന്ന നെക്ലെയ്സ്, രണ്ട് പവന്‍ വീതം തൂക്കമുള്ള ഒരു ജോഡി വളകള്‍, ഒന്നര പവ​െൻറ രണ്ട് വളകള്‍, രണ്ടു പവനുള്ള ഏഴ് മോതിരങ്ങള്‍ ഒരു ജോഡി കമ്മല്‍ എന്നിവയാണ് കവർന്നത്. വീടി​െൻറ പിന്നില്‍ അടുക്കളയുടെ വാതില്‍ തകര്‍ത്താണ് മോഷ്ടാവ് ഉള്ളില്‍ കയറിയത്. ശനിയാഴ്ച രാവിലെ വീട്ടുകാര്‍ ഉണർന്നപ്പോഴാണ് സംഭവം അറിഞ്ഞത്. വിരലടയാള വിദഗ്ധര്‍ സ്ഥലത്തെത്തി തെളിവുകള്‍ ശേഖരിച്ചു. അജിത്‌കുമാര്‍ നല്‍കിയ പരാതിയുടെ അടിസ്ഥാനത്തില്‍ വട്ടിയൂര്‍ക്കാവ് പൊലീസ് കേസെടുത്ത് അന്വേഷണം ആരംഭിച്ചു.