മാല മോഷ്​ടിച്ച കേസിൽ പ്രതിക്ക് മൂന്നുവർഷം കഠിനതടവ്

കൊല്ലം: ബൈക്കിലെത്തി പെൺകുട്ടിയുടെ മാല കവർന്ന കേസിൽ പ്രതിക്ക് മൂന്നുവർഷം കഠിനതടവ്. കാർത്തികപ്പള്ളി കൃഷ്ണപുരം കളീയ്ക്കത്തറ വടക്കതിൽ വീട്ടിൽ സജീത്തിനെയാണ് കൊല്ലം ഫസ്റ്റ് ക്ലാസ് അഡീഷനൽ ജഡ്ജി ഇ. ബൈജു ശിക്ഷ വിധിച്ചത്. 2017 മേയ് 24ന് കരുനാഗപ്പള്ളി ഗുരുമന്ദിരം-ചെറുപാറ റോഡിലാണ് സംഭവം. സൈക്കിളിൽ വരികയായിരുന്ന 12 വയസ്സുള്ള കുട്ടിയുടെ രണ്ടരപ്പവൻ തൂക്കമുള്ള മാലയാണ് പ്രതി അപഹരിച്ചത്. കരുനാഗപ്പള്ളി പൊലീസ് കേസ് അന്വേഷിക്കവേ മറ്റൊരു മാല പൊട്ടിക്കൽ കേസിൽ ഇയാൾ പന്തളത്ത് അറസ്റ്റിലായി. വിൽപന നടത്തിയ ജ്വല്ലലറിയിൽനിന്ന് സ്വർണം കണ്ടെടുത്തിരുന്നു. പ്രോസിക്യൂഷൻ ഒന്നുമുതൽ ആറുവരെ സാക്ഷികളെയും ഏഴുരേഖകളും സ്വർണം ഹാജരാക്കി വിസ്തരിച്ചു. പ്രോസിക്യൂട്ടർമാരായ കെ.പി. ജബ്ബാർ, ജി. സുഹോത്രൻ, അമ്പിളി ജബ്ബാർ എന്നിവർ കോടതിയിൽ ഹാജരായി.