കന്യാകുമാരിയിൽ മഴ കനത്തു; മൂന്ന് വീടുകൾ തകർന്നു

നാഗർകോവിൽ: കന്യാകുമാരി ജില്ലയിൽ തിങ്കളാഴ്ച രാത്രി തുടങ്ങിയ ഇടിയോടുകൂടിയ മഴ ചൊവ്വാഴ്ചയും തുടർന്നു. സ്കൂൾ, കോളജുകൾക്ക് അവധി നൽകാത്തതു കാരണം കുട്ടികളും ദുരിതത്തിൽപെട്ടു. അരുമന ഭാഗത്ത് മരം വീണ് രണ്ട് വീടുകളും കരുങ്കലിൽ ഒരു വീട് ഭാഗികമായും തകർന്നു. കുളച്ചലിൽ അണ്ണാദുരൈയുടെ പ്രതിമയുടെ മുഖം മിന്നലേറ്റ് തകർന്നു. പല സ്ഥലങ്ങളിലും മണിക്കൂറുകൾ നീണ്ട ഗതാഗതക്കുരുക്ക് അനുഭവപ്പെട്ടു. കൃഷി നാശവും സംഭവിച്ചിട്ടുണ്ട്. വിവേകാനന്ദപ്പാറയിലേക്കുള്ള ബോട്ട് സർവിസ് താൽക്കാലികമായി നിർത്തിെവച്ചു. തക്കല, കോഴിപ്പോർവിള എന്നിവിടങ്ങളിലും വൻ മഴ ലഭിച്ചു.