അഴകളവി​െൻറ ആനച്ചന്തവുമായി തെച്ചിക്കോട്ടുകാവ് രാമചന്ദ്രൻ; ആവേശ വരവേൽപ്പൊരുക്കി ആനപ്രേമികൾ

ചവറ: വിരിഞ്ഞ മസ്തകമുയർത്തി അഴകളവി​െൻറ ആനച്ചന്തവുമായി തെച്ചിക്കോട്ടുകാവ് രാമചന്ദ്രൻ ചവറയുടെ മണ്ണിലിറങ്ങിയപ്പോൾ പൂരാവേശത്തിന് സമാനമായ വരവേൽപ്. ആയിരങ്ങൾക്ക് മുന്നിൽ ഗജരാജ ചക്രവർത്തിയുടെ പകിട്ടോടെയായിരുന്നു ആനപ്രേമികളുടെ ഹൃദയാവേശമായ കരിവീര​െൻറ എഴുന്നള്ളത്ത്. ചവറ മേനാമ്പള്ളി കുമ്പഴക്കാവ് ശ്രീ ദുർഗാ ആദർശ യക്ഷി ക്ഷേത്രത്തിലെ ഗജമേളയക്കാണ് കേരളത്തിലെ ഏറ്റവും വലിയ ഉയരക്കേമനായ തെച്ചിക്കോട്ട്കാവ് രാമചന്ദ്രൻ എത്തിയത്. നാലു വർഷത്തി​െൻറ ഇടവേളക്ക് ശേഷമാണ് തെക്കൻ കേരളത്തിൽ എത്തുന്നത്. തൃശൂർ ജില്ലയിലെ പേരാമംഗലത്തുള്ള തെച്ചിക്കോട്ട് കാവിലെ ആനയായ രാമചന്ദ്രൻ ഏഷ്യയിലെ ഏറ്റവും വലിയ രണ്ടാമത്തെ ആനയാണ്. 317 സ​െൻറിമീറ്ററാണ് ഉയരം. ഞായറാഴ്ച രാവിലെ ഏഴുമണി മുതൽ കേരളത്തി​െൻറ വിവിധ ഭാഗങ്ങളിൽനിന്ന് ആയിരക്കണക്കിന് ആനപ്രേമികൾ എത്തിയിരുന്നു. നൂറുകണക്കിന് ഇരുചക്ര വാഹനങ്ങളുടെ അകമ്പടിയോടെ 10 മണിയോടെ കൊറ്റൻകുളങ്ങരയിൽ തെച്ചിക്കോടൻ എത്തുമ്പോൾ ദേശീയപാതയും പരിസരവും ആനപ്രേമികളാൽ നിറഞ്ഞിരുന്നു. ക്ഷേത്രത്തിൽ നടന്ന ആനയൂട്ടിന് ശേഷമാണ് കാഴ്ചപ്പെരുമയുടെ വിസ്മയം തീർത്ത ഗജമേള അരങ്ങേറിയത്.