പാൽ 'ചെക്പോസ്​റ്റ്​' തെന്മലയിൽ ആരംഭിക്കും

പുനലൂർ: അതിർത്തി ചെക്പോസ്റ്റുകളോട് അനുബന്ധിച്ച് സർക്കാർ അനുവദിച്ച പാൽ പരിശോധന കേന്ദ്രം ആര്യങ്കാവിലേത് തെന്മലയിൽ ആരംഭിക്കും. അതിർത്തിയായ ആര്യങ്കാവിൽ കേന്ദ്രം തുടങ്ങാനുള്ള കെട്ടിടസൗകര്യം ലഭിക്കാത്തതിനെ തുടർന്നാണ് 10 കിലോമീറ്റർ അകലെ തെന്മലയിൽ സ്ഥാപിക്കാൻ തീരുമാനമായത്. ക്ഷീര വികസന വകുപ്പി‍​െൻറ മേൽനോട്ടത്തിലാണ് സ്ഥിരം പരിശോധനകേന്ദ്രം തുടങ്ങുന്നത്. ആര്യങ്കാവിൽ കെട്ടിടം കിട്ടാതായതോടെ വകുപ്പ് മന്ത്രിയും സ്ഥലം എം.എൽ.എയുമായ കെ. രാജു ഇടപെട്ടതിനെ തുടർന്ന് വനംവകുപ്പി​െൻറ തെന്മല ഡിപ്പോയിലുള്ള പഴയ കെട്ടിടത്തിലാണ് കേന്ദ്രം തുടങ്ങുന്നത്. ലേലത്തിന് എത്തിക്കുന്ന തടികൾ സൂക്ഷിക്കാൻ വർഷങ്ങൾക്ക് മുമ്പ് നിർമിച്ച തകരഷീറ്റ് മേഞ്ഞ ഈ ഷെഡ് ഇപ്പോൾ വെറുതെ കിടക്കുകയാണ്. ഇതി​െൻറ ഒരുഭാഗത്ത് പ്രത്യേക കാബിൻ നിർമിച്ച് പാൽ പരിശോധന കേന്ദ്രം പ്രവർത്തിക്കും. മേയ് 19ന് കേന്ദ്രത്തി​െൻറ ഉദ്ഘാടനം നടക്കും. തമിഴ്നാട്ടിൽനിന്ന് ദിനേന 20 ടാങ്കറുകളിൽ പാലും തൈരും കേരളത്തിലേക്ക് കൊണ്ടുവരുന്നുണ്ട്. കൂടാതെ കവറിലും ചെറിയ കാനുകളിലും പാലും തൈരും എത്തിക്കുന്നുണ്ട്. പരിശോധന സംവിധാനമില്ലാത്തതിനാൽ ഈ പാലി​െൻറ ഗുണമേന്മയെക്കുറിച്ച് വ്യാപകമായ പരാതിയുണ്ട്. തിരുനെൽവേലി, മധുര ജില്ലകളിലെ ഫാമുകളിൽനിന്ന് ഡയറികളിൽനിന്നുമാണ് പാൽ എത്തിക്കുന്നത്. ഓണക്കാലത്ത് പാൽ പരിശോധിക്കാനുള്ള താൽക്കാലിക സംവിധാനം ഒരുക്കാറുണ്ട്.