ശാസ്താംകോട്ടയിലെ വാനരസേനക്ക് ഉത്രാടസദ്യയോടെ ഓണത്തുടക്കം

ശാസ്താംകോട്ട: തൂശനിലയിൽ ഉപ്പ് മുതൽ പാലട പ്രഥമൻ വരെയുള്ള വിഭവങ്ങൾ നിരന്നപ്പോൾ അത് ശാസ്താംകോട്ട ശ്രീ ധർമശാസ്താ ക്ഷേത്രത്തിലെ വാനരസംഘത്തിന് രുചിയൂറുന്നൊരു ഓണക്കാലത്തി​െൻറ തുടക്കമായി. ക്ഷേത്രത്തിലെ വാനരന്മാരെ പരിപാലിക്കുന്നതിനുള്ള സമിതി ഒരുക്കിയ ഓണസദ്യ 50ലധികം വാനരന്മാർ അച്ചടക്കത്തോടെ അകത്താക്കി. ഉപ്പേരിയും പപ്പടവും രണ്ട് തരം പായസങ്ങളും ചേർന്ന സദ്യക്ക് ഉപയോഗിച്ചത് ചമ്പാവരിയാണ്. ഉത്രാടദിവസമായ ഞായറാഴ്ച ഉച്ചക്ക് 11.30ഒാടെ ആരംഭിച്ച സദ്യ ഒന്നരമണിക്കൂറോളം നീണ്ടു.