പട്ടാളത്തിൽ ജോലി വാഗ്ദാനം ചെയ്ത് പണം തട്ടുന്ന സംഘം സജീവം

ചവറ: ആർമി റിക്രൂട്ട്മ​െൻറുകളുടെ മറവിൽ ജോലി വാഗ്ദാനം ചെയ്ത് യുവാക്കളിൽനിന്ന് പണം തട്ടുന്ന സംഘം സജീവം. ജോലിമോഹികളായ ചെറുപ്പക്കാരെയും രക്ഷിതാക്കളെയും പരിശീലനത്തി​െൻറ മറവിൽ കബളിപ്പിച്ചാണ് ലക്ഷങ്ങൾ വാങ്ങിയെടുക്കുന്നത്. ദിവസങ്ങൾ നീളുന്ന പരിശീലനവും ഇക്കൂട്ടർ നൽകുന്നുണ്ട്. റിക്രൂട്ട്മ​െൻറിൽ സ്വന്തം കഴിവുകൊണ്ട് യോഗ്യത നേടിയ നിരവധിപേരിൽനിന്ന് ഇക്കൂട്ടർ പണംവാങ്ങിയതായി ആർമി ഇൻറലിജൻസിന് റിപ്പോർട്ട് കിട്ടിയതി​െൻറ അടിസ്ഥാനത്തിൽ രഹസ്യാന്വേഷണം നടക്കുകയാണ്. കഴിഞ്ഞദിവസം പന്മന സ്വദേശിയായ വിമുക്ത ഭടനെ കോഴിക്കോട് നടക്കാവ് െപാലീസും ആർമി ഇൻറലിജൻറ്സ് സംഘവും കസ്റ്റഡിയിലെടുത്ത് ചോദ്യം ചെയ്തിരുന്നു. നിരവധി പേരിൽനിന്ന് ഇയാൾ പണം വാങ്ങിയതായുള്ള വിവരത്തി​െൻറ അടിസ്ഥാനത്തിലാണ് ചോദ്യംചെയ്തത്. ആർമി നഴ്സിങ് കം സോൾജ്യർ തസ്തികയിലേക്ക് റിക്രൂട്ട്മ​െൻറ് റാലി കോഴിക്കോട് നടക്കുകയാണ്. ഇവിടെ ഇയാൾ കുട്ടികളുമായി എത്തിയിരുന്നു. ഒരുവർഷം മുമ്പ് തിരുവനന്തപുരത്ത് നടന്ന റിക്രൂട്ട്മ​െൻറിൽ ഇയാളെ കേൻറാൺമ​െൻറ് പൊലീസ് കസ്റ്റഡിയിലെടുത്ത് ചോദ്യം ചെയ്തിരുന്നു. ജോലികിട്ടിയ പലരുടെയും രക്ഷിതാക്കൾ ഇയാൾക്ക് പണം നൽകിയതായാണ് കണ്ടെത്തൽ. എന്നാൽ, രേഖാമൂലം ആരും പരാതി നൽകാത്തതിനാൽ നടപടി എടുക്കാതെ വിട്ടയക്കുകയായിരുന്നു. സമാന രീതിയിൽ പരിശീലനം നൽകി റിക്രൂട്ട്മ​െൻറിൽ പങ്കെടുപ്പിക്കുന്ന നിരവധിപേരാണ് ഇപ്പോൾ അന്വേഷണ സംഘത്തി​െൻറ നിരീക്ഷണത്തിൽ. ശാരീരികക്ഷമത പരീക്ഷയിൽ വിജയിച്ചാൽ പകുതി തുകയും ജോലിലഭിച്ചാൽ ബാക്കി തുകയും വാങ്ങിച്ചെടുക്കുകയാണ് രീതി. കസ്റ്റഡിയിലെടുത്ത പന്മന സ്വദേശിയെ താക്കീത് ചെയ്ത് വിട്ടയച്ചെങ്കിലും വ്യാജ പരിശീലകരെയും തട്ടിപ്പ് സംഘങ്ങളെയും കൂടുതൽ നിരീക്ഷിക്കുമെന്ന് അന്വേഷണ ഉദ്യോഗസ്ഥർ പറഞ്ഞു.