റോഡ് കൈയേറ്റം പി.ഡബ്ല്യു.ഡി ഒഴിപ്പിച്ചു; നടപടി സ്വകാര്യ വ്യക്തിയുടെ പരാതിയെ തുടർന്ന്

കിളിമാനൂർ: പി.ഡബ്ല്യു.ഡി റോഡിൽ അനധികൃതമായി നിർമിച്ച ബസ് കാത്തിരിപ്പ് കേന്ദ്രം, ശ്രീനാരായണ ഗുരുമന്ദിരം, രാഷ്ട്രീയ പാർട്ടികളുടെ കൊടിമരങ്ങൾ, സ്വകാര്യവ്യക്തി നടത്തിവന്ന മുറുക്കാൻ കട എന്നിവ അധികൃതർ ഒഴിപ്പിച്ചു. സമീപവാസിയായ സ്വകാര്യ വ്യക്തിയുടെ പരാതിയെ തുടർന്നാണ് നടപടി. അതേസമയം, നിർധന കുടുംബത്തി​െൻറ ഉപജീവന മാർഗമായ തട്ടുകട മാറ്റിസ്ഥാപിക്കാനുള്ള സമയപരിധിപോലും ബന്ധപ്പെട്ടവർ നൽകിയില്ലെന്ന് പരാതിയുണ്ട്. നഗരൂർ പഞ്ചായത്തിലെ ചെമ്മരത്ത് മുക്ക് -കല്ലമ്പലം റോഡിൽ പാളയം കവലയിലാണ്, റോഡരികിൽ നിർമാണ പ്രവർത്തനങ്ങൾ നടത്തിയിരുന്നത്. 60 വർഷത്തിലേറെ പഴക്കമുള്ളതാണ് ഗുരുദേവമന്ദിരമെന്നും നിരവധിതവണ റോഡ് വികസനം ഉണ്ടായിട്ടുപോലും ഇവ നീക്കംചെയ്യാൻ ബന്ധപ്പെട്ടവർ ആവശ്യപ്പെട്ടിരുന്നില്ലെന്നും പ്രദേശവാസികൾ പറയുന്നു. പാളയം തുണ്ടിൽ പുത്തൻവീട്ടിൽ മണിദാസി​െൻറ കടയും നീക്കംചെയ്തു. വർഷങ്ങളായി ഇവിടെ കച്ചവടം നടത്തിയാണ് താൻ ഉപജീവനം നടത്തുന്നതെന്നും കട നീക്കംചെയ്യുന്നത് സംബന്ധിച്ച് ഒരു അറിയിപ്പും ലഭിച്ചില്ലെന്നും ഇദ്ദേഹം പറഞ്ഞു. പരിസരവാസി നൽകിയ പരാതിയിൽ കോടതിയിൽ കേസ് നിലനിൽക്കുന്നുണ്ടെന്നും അതി​െൻറ വിധി വരുംമുമ്പാണ് അധികൃതരുടെ നടപടിയെന്നും മണിദാസ് പറഞ്ഞു. എന്നാൽ, നടപടി തീർത്തും നിയമപരമാണെന്നാണ് അധികൃതരുടെ വാദം. കിളിമാനൂർ സി.ഐയുടെ നേതൃത്വത്തിൽ വൻ പൊലീസി​െൻറ നിയന്ത്രണത്തിലാണ് ഒഴിപ്പിക്കൽ നടന്നത്.