വില കുതിച്ചുയർന്നിട്ടും സർക്കാർ ആഘോഷത്തിൽ ^ചെന്നിത്തല

വില കുതിച്ചുയർന്നിട്ടും സർക്കാർ ആഘോഷത്തിൽ -ചെന്നിത്തല തിരുവനന്തപുരം: അരിയുടെയും പച്ചക്കറിയുടെയും വില വീണ്ടും കുതിച്ചുയര്‍ന്നിട്ടും സര്‍ക്കാര്‍ ഒരു നടപടിയുമെടുക്കുന്നില്ലെന്ന് പ്രതിപക്ഷ നേതാവ് രമേശ് ചെന്നിത്തല കുറ്റപ്പെടുത്തി. വിപണിയില്‍ അരിവില കിലോക്ക് 55 രൂപ വരെ എത്തി റെക്കോഡ് ഇട്ടിരിക്കുകയാണ്. എന്നാൽ, സര്‍ക്കാര്‍ ഇതൊന്നുമറിയാതെ ഒന്നാം വാര്‍ഷികത്തി​െൻറ ആഘോഷലഹരിയിലാണ്. ചെറിയ ഉള്ളിയുടെ വിലയും അനിയന്ത്രിതമായി കുതിച്ചുയരുകയാണ്. പച്ചക്കറി വിലയും ഇരട്ടിയോളമായി. സര്‍ക്കാര്‍ കാര്യക്ഷമമായി വിപണി ഇടപെടല്‍ നടത്താത്തതാണ് വില കുതിച്ചുയരാന്‍ കാരണം. കഴിഞ്ഞ മാസങ്ങളില്‍ താളംതെറ്റിയ റേഷന്‍ വിതരണം എല്ലാ ജില്ലകളിലും പൂര്‍ണതോതില്‍ പുനഃസ്ഥാപിക്കാന്‍ സര്‍ക്കാറിന് ഇനിയും കഴിഞ്ഞിട്ടില്ല. പരസ്യം നല്‍കിയതുകൊണ്ടു മാത്രം വിലകുറയില്ലെന്ന് സര്‍ക്കാര്‍ തിരിച്ചറിയണമെന്നും ചെന്നിത്തല പറഞ്ഞു.