ബി.എസ്​.എൻ.എൽ ​ബ്രോഡ്​ബാൻഡ്​ നിരക്കുകൾ കുറച്ചു

തിരുവനന്തപുരം: ബി.എസ്.എൻ.എൽ, ലാൻഡ് ലൈൻ/ഒാപ്ടിക്കൽ ഫൈബർ വഴി നൽകിവരുന്ന ബ്രോഡ്ബാൻഡ് പ്ലാനുകൾ കൂടുതൽ ഉദാരവും ആകർഷകവുമാക്കി. പുതിയ 599 രൂപയുടെ അൺലിമിറ്റഡ് ബ്രോഡ്ബാൻഡ് പ്ലാനിൽ വേഗത നിയന്ത്രണങ്ങളൊന്നും തന്നെ കൂടാതെ രണ്ട് എം.ബി.പി.എസ് വേഗതയിൽ പരിധിയില്ലാതെ എത്ര ജി.ബി ഇൻറർനെറ്റ് വേണമെങ്കിലും ഉപയോഗിക്കാം. മുൻകാലങ്ങളിൽ 1199 രൂപയുടെ കോംബോഫോണിന് പ്രത്യേക ചാർജൊന്നും ഇൗടാക്കാത്ത 599 രൂപയുടെ ഇൗ പ്ലാനിൽ രാത്രികാല (വൈകീട്ട് ഒമ്പത് മുതൽ രാവിലെ എഴുവരെ) സൗജന്യ കോളുകൾക്കൊപ്പം ഞായറാഴ്ചകളിൽ ലഭിക്കുന്ന 24 മണിക്കൂർ സൗജന്യ കോളുകളും ലഭിക്കും. 675 രൂപയുടെ നിലവിലുള്ള പ്ലാനിൽ നാല് എം.ബി.പി.എസ് വേഗതയിൽ അഞ്ച് ജി.ബി വരെ ലഭിച്ചുകൊണ്ടിരിക്കുന്നത് 10 ജി.ബി വരെയും 999 രൂപയുടെ പ്ലാനിൽ നാല് എം.ബി.പി.എസ് വേഗതയിൽ 20 ജി.ബി വരെ ലഭിച്ചുകൊണ്ടിരുന്നത് 30 ജി.ബി വരെയായും പരിഷ്കരിച്ചു. നഗരപ്രദേശങ്ങളിലെ നിലവിൽ ബ്രോഡ്ബാൻഡില്ലാത്ത ലാൻഡ്ലൈൻ ഉപഭോക്താക്കൾക്ക് പ്രതിമാസം വെറും ഒമ്പതു രൂപ അധികം നൽകിയാൽ രണ്ട് എം.ബി.പി.എസ് വേഗതയിൽ അഞ്ച് ജി.ബി വരെയും ശേഷം വൺ എം.ബി.പി.എസ് വേഗതയിൽ പരിധിയില്ലാതെയും ഇൻറർനെറ്റ് ഉപയോഗിക്കാവുന്ന 249 രൂപയുടെ കോംബോ പ്ലാൻ ലഭിക്കും.