പതിമൂന്ന് കണ്ണറപാലം ചിത്രപ്പണിയാൽ മോടിയാക്കും

പുനലൂർ: കൊല്ലം--ചെങ്കോട്ട റെയിൽപാതയിലെ കരിങ്കല്ലിൽ തീർത്ത കഴുതുരുട്ടി പതിമൂന്ന് കണ്ണറപാലം ചിത്രങ്ങളാൽ മോടിപിടിപ്പിക്കും. ഒന്നേകാൽ നൂറ്റാണ്ട് മുമ്പ് ഇറ്റാലിയൻ നിർമാണ ശൈലിയിൽ ബ്രിട്ടീഷ് എൻജിനീയർമാരുടെ മേൽനോട്ടത്തിലാണ് ഈ പാലം നിർമിച്ചത്. മീറ്റർഗേജായിരുന്ന പാത ബ്രോഡ്ഗേജാക്കിയതോടെ ബലപ്പെടുത്താനായി കരിങ്കൽ തൂണുകളടക്കം ജാക്കറ്റ് ചെയ്തു. പഴയ കരിങ്കല്ലി​െൻറ മനോഹാരിത വീണ്ടെടുക്കാൻ തൂണുകളിലെ ജാക്കറ്റിന് പുറത്ത് ചെത്തിമിനുക്കിയ കരിങ്കൽ പാളികൾ ഒട്ടിച്ചിട്ടുണ്ട്. കരിങ്കൽ പാകാൻ കഴിയാത്ത ആർച്ചുകളിലാണ് ചിത്രങ്ങൾ ആലേഖനം ചെയ്യുക. ഇതി​െൻറ മുന്നോടിയായി സിമൻറിനുമേൽ നിറമടിക്കാൻ തുടങ്ങി. ഈ പാലത്തി​െൻറ പൈതൃകം സംരക്ഷിക്കണമെന്ന് സമരസമിതി ചെയർമാനും പരിസ്ഥിതി പ്രവർത്തകനുമായ എ.ടി. ഫിലിപ് ചെെന്നെയിലെത്തി റെയിൽവേ ചീഫ് അഡ്മിനിസ്ട്രേറ്റിവ് ഓഫിസർ സുധാകർ റാവു, ചീഫ് എൻജിനീയർ രവീന്ദ്രബാബു എന്നിവരോട് ആവശ്യപ്പെട്ടിരുന്നു. അപ്പോഴാണ് ചിത്രങ്ങളെക്കുറിച്ച് അധികൃതർ അറിയിച്ചത്. പാലത്തി​െൻറ ഇരുവശങ്ങളിലും തൂണുകളിലും കല്ലുപാകൽ പൂർത്തിയായി. കർണാടകയിലെ കൃഷ്ണഗിരിയിൽനിന്നുള്ള പ്രത്യേകതരം കല്ലുകളാണ് ഇതിന് ഉപയോഗിച്ചത്. ഇതിനായി നാലുകോടി ചെലവിട്ടു. പാലത്തി​െൻറ തറയിലും കല്ലുകൾ പാകി മനോഹരമാക്കണമെന്ന ആവ‍ശ്യമുണ്ട്.