അമരവിള ചെക്പോസ്​റ്റിൽ രണ്ട് കിലോ കഞ്ചാവ് പിടികൂടി

പാറശ്ശാല: അമരവിള ചെക്‌പോസ്റ്റ് വഴി ഇരുചക്രവാഹനത്തില്‍ കേരളത്തിലേക്ക് കടത്താന്‍ ശ്രമിച്ച രണ്ട് കിലോ കഞ്ചാവ് എക്സൈസ് അധികൃതര്‍ പിടികൂടി. ബുധനാഴ്ച രാവിലെ വാഹന പരിശോധനക്കിടെ സംശയാസ്പദമായി കണ്ട പള്‍സര്‍ ബൈക്ക് പരിശോധനക്ക് വിധേയമാക്കിയപ്പോഴാണ് രണ്ട് കിലോ കഞ്ചാവ് കണ്ടെടുത്തത്. കടത്താന്‍ ശ്രമിച്ച പറണ്ടോട് സ്വദേശി ഷംനാദിനെ എക്‌സൈസ് സംഘം പിടികൂടി. നാഗര്‍കോവിലില്‍നിന്ന് വാങ്ങി ചില്ലറ വിൽപനക്കായി കൊണ്ടുപോകുന്നതിനിടെയാണ് പിടിയിലായത്. എക്‌സൈസ് സി.ഐ രാജന്‍ ബാബു, എക്‌സൈസ് ഇന്‍സ്‌പെക്ടര്‍ സുനില്‍കുമാര്‍, പ്രിവൻറിവ് ഓഫിസര്‍മാരായ അനില്‍കുമാര്‍, ഗിരീഷ്, സിവില്‍ എക്‌സൈസ് ഓഫിസര്‍മാരായ നജിമുദ്ദീന്‍, രതീഷ്, സുനില്‍ജോസ് എന്നിവരടങ്ങുന്ന സംഘമാണ് പിടികൂടിയത്.