എണ്ണപ്പനത്തോട്ടത്തിൽ വീണ്ടും ആക്രമണം; ജീവനക്കാരിയുടെ മാല മോഷ്​ടിക്കാൻ ശ്രമം

അഞ്ചൽ: ഭാരതീപുരം എണ്ണപ്പനത്തോട്ടത്തിൽ വീണ്ടും ആക്രമണം. ജീവനക്കാരിയുടെ മാല കവരാനുള്ള ശ്രമമാണ് നടന്നത്. രണ്ട് ദിവസം മുമ്പ് തോട്ടത്തിലെ ഒാവർസിയർക്കുനേരെ ആസിഡ് ആക്രമണമുണ്ടായിരുന്നു. എ ഡിവിഷനിലെ മെസഞ്ചർ വിജയമ്മയുടെ മാല പിന്നാലെ ബൈക്കിലെത്തിയ രണ്ട് യുവാക്കൾ പൊട്ടിച്ചെടുക്കാൻ ശ്രമിച്ചെങ്കിലും വിജയിച്ചില്ല. കവർച്ചശ്രമത്തിനിടെ വിജയമ്മയുടെ കൈയിലെ ബാഗ് കൊണ്ടുള്ള അടിയേറ്റ് ബൈക്കി​െൻറ പിന്നിലിരുന്നയാൾ തറയിൽ വീണു. വിജയമ്മ ബഹളംവെച്ചപ്പോൾ ഒരാൾ ബൈക്കുമായി രക്ഷപ്പെടുകയും തറയിൽ വീണയാൾ എണ്ണപ്പനത്തോട്ടത്തിനുള്ളിലേക്ക് ഓടിമറയുകയും ചെയ്തു. രണ്ട് ദിവസം മുമ്പാണ് ഈ സ്ഥലത്തിന് സമീപം ഓഫിസിലെ ഓവർസിയറെ ആസിസ് ഒഴിച്ച് അപായപ്പെടുത്താൻ ശ്രമിച്ചിരുന്നത്. അദ്ദേഹമിപ്പോൾ തിരുവനന്തപുരം കണ്ണാശുപത്രിയിലെ തീവ്രപരിചരണ വിഭാഗത്തിൽ ചികിത്സയിലാണ്.