കുടിവെള്ള പദ്ധതിക്കായി പൈപ്പിട്ട ഭാഗത്ത് വാഹനങ്ങള്‍ അപകടത്തില്‍പെടുന്നു

കാട്ടാക്കട:- കുടിവെള്ള പദ്ധതിക്കായി പൈപ്പിട്ട ഭാഗത്ത് വാഹനങ്ങള്‍ അപകടത്തില്‍പെടുന്നത് പതിവാകുന്നു. നെടുമങ്ങാട്-ഷോര്‍ളക്കോട് റോഡിലെ കുറ്റിച്ചല്‍ -മാര്‍ക്കറ്റ് ജങ്ഷനിലാണ് അപകടം നിത്യമായിരിക്കുന്നത്. പൈപ്പിടാനായി കുഴിച്ച ശേഷം മൂടിയ ഭാഗത്തുകൂടി വാഹനങ്ങള്‍ കടന്നുപോകുമ്പോഴാണ് താഴുന്നത്. തമിഴ്നാട്ടില്‍നിന്ന് ഉള്‍പ്പെടെ ഭാരം കയറ്റിവരുന്ന വാഹനങ്ങളാണ് കൂടുതൽ അപകടത്തിൽപെടുന്നത്. വാഹനങ്ങള്‍ റോഡില്‍ അകപ്പെടുന്നതോടെ ഗതാഗതവും സ്തംഭനത്തിലാകും. കുഴികള്‍ ശരിയായി മൂടാത്തതും ടാറിങ് നടത്താത്തതുമാണ് കാരണമെന്നാണ് നാട്ടുകാർ പറയുന്നത്.