കണ്ണൂരില്‍ നടക്കുന്നത് സി.പി.എം ഫാഷിസം –ഒ. രാജഗോപല്‍

തിരുവനന്തപുരം: കണ്ണൂരില്‍ നടക്കുന്നത് സി.പി.എം ഫാഷിസമാണെന്ന് ബി.ജെ.പി നേതാവ് ഒ. രാജഗോപാല്‍ എം.എല്‍.എ. മുഖ്യമന്ത്രി പിണറായി വിജയന്‍, പാര്‍ട്ടി സെക്രട്ടറി കോടിയേരി ബാലകൃഷ്ണന്‍ എന്നിവരാണ് അതിന് ഒത്താശ നല്‍കുന്നതെന്നും അദ്ദേഹം പറഞ്ഞു. കണ്ണൂരിലെ ബി.ജെ.പി പ്രവര്‍ത്തകന്‍െറ കൊലപാതകത്തില്‍ പ്രതിഷേധിച്ച് ബി.ജെ.പി നടത്തിയ സെക്രട്ടേറിയറ്റ് മാര്‍ച്ച് ഉദ്ഘാടനം ചെയ്യുകയായിരുന്നു രാജഗോപാല്‍. സംസ്ഥാനത്ത് അക്രമങ്ങളും ഫാഷിസവും നടപ്പാക്കുന്നത് ബി.ജെ.പിയെന്നാണ് സി.പി.എം ആരോപിക്കുന്നത്. ഫാഷിസം എന്താണെന്ന് സി.പി.എം കണ്ണൂരില്‍ നടത്തുന്ന അക്രമങ്ങളിലൂടെ ജനങ്ങള്‍ക്ക് കാണിച്ചുകൊടുക്കുകയാണെന്നും അദ്ദേഹം പറഞ്ഞു. ഗാന്ധിപാര്‍ക്കില്‍നിന്ന് ആരംഭിച്ച മാര്‍ച്ചിന് ബി.ജെ.പി നേതാക്കളായ സി. ശിവന്‍കുട്ടി, ജെ.ആര്‍. പത്മകുമാര്‍, പാപ്പനംകോട് സജി, ചെമ്പഴന്തി ഉദയന്‍ എന്നിവര്‍ നേതൃത്വം നല്‍കി. ഡോ. പി.പി. വാവ, വി.വി. രാജേഷ്, ജില്ലാ പ്രസിഡന്‍റ്, എസ്. സുരേഷ്, ബി.എം.എസ് ജില്ലാ ജനറല്‍ സെക്രട്ടറി ബാബുക്കുട്ടന്‍ എന്നിവര്‍ സംസാരിച്ചു.