മാധ്യമത്തിന്‍െറ സാമൂഹികസേവന പ്രവര്‍ത്തനങ്ങള്‍ പ്രശംസനീയം –കടകംപള്ളി

പൂന്തുറ: പത്രരംഗത്തിനൊപ്പം സാമൂഹികസേവനരംഗത്തും ‘മാധ്യമം’ നടത്തുന്ന പ്രവര്‍ത്തനങ്ങള്‍ പ്രശംസനീയമെന്ന് മന്ത്രി കടകംപള്ളി സുരേന്ദ്രന്‍. ബീമാപള്ളി യു.പി സ്കൂളില്‍ മാധ്യമം ‘കുടുംബ’വും ദിവ്യപ്രഭ കണ്ണാശുപത്രിയും സംയുക്തമായി സംഘടിപ്പിച്ച സൗജന്യ നേത്രരോഗ ചികിത്സാ ക്യാമ്പ് ഉദ്ഘാടനം ചെയ്യുകയായിരുന്നു അദ്ദേഹം. മലയാള പത്രരംഗത്ത് സ്വതന്ത്രകാഴ്ചപ്പാടുകളുമായി മുമ്പോട്ട് പോകുന്ന മാധ്യമത്തിന്‍െറ നയസമീപനങ്ങളില്‍ വ്യത്യസ്ത അഭിപ്രായം ഉണ്ടെങ്കിലും നിലപാടും സത്യസന്ധതയുമാണ് പത്രത്തെ വേറിട്ടുനിര്‍ത്തുന്നതെന്നും മന്ത്രി പറഞ്ഞു. റെസിഡന്‍റ് മാനേജര്‍ വി.സി. മുഹമ്മദ് സലിം അധ്യക്ഷത വഹിച്ചു. ദിവ്യപ്രഭ കണ്ണാശുപത്രി എം.ഡി ഡോ. ദേവിന്‍ പ്രഭാകര്‍, ഡോ. സുശീല പ്രഭാകര്‍, വാര്‍ഡ് കൗണ്‍സിലര്‍ സജീന, സ്കൂള്‍ എസ്.എം.സി ചെയര്‍മാന്‍ എം. ഇക്ബാല്‍ എന്നിവര്‍ സംസാരിച്ചു. സ്കൂള്‍ പ്രധാനാധ്യാപിക കൃഷ്ണദേവി സ്വാഗതവും മാധ്യമം സര്‍ക്കുലേഷന്‍ മാനേജര്‍ മുഹമ്മദ് ഹാരിസ് നന്ദിയും പറഞ്ഞു. മാധ്യമം ‘കുടുംബം’ മാഗസിന്‍ മന്ത്രി ചടങ്ങില്‍വെച്ച് പ്രധാനാധ്യാപികക്ക് കൈമാറി.