ടി.എച്ച്.എസ് ഇനി സമ്പൂര്‍ണ ഇ-സാക്ഷരത വാര്‍ഡ്

നെടുമങ്ങാട് : പോളിടെക്നിക് എന്‍.എസ്.എസ് വളന്‍റിയര്‍മാര്‍ മാസങ്ങളായി നടത്തിയ പ്രവര്‍ത്തനങ്ങളിലൂടെ നെടുമങ്ങാട് നഗരസഭയിലെ ടി.എച്ച്.എസ് വാര്‍ഡിനെ സമ്പൂര്‍ണ ഇ-സാക്ഷരത വാര്‍ഡായി പ്രഖ്യാപിച്ചു. കമ്പ്യൂട്ടറും ഇ-മെയില്‍, മൊബൈല്‍ ആപ്ളിക്കേഷന്‍സ്, ഇന്‍റര്‍നെറ്റ്, നവമാധ്യമങ്ങള്‍ എന്നിവയെക്കുറിച്ച് അറിവ് നല്‍കുകയും ഇവ ഉപയോഗിക്കാന്‍ മുഴുവന്‍ ആളുകളെയും പ്രാപ്തരാക്കുകയും ചെയ്തു. പാചക വാതകം ബുക് ചെയ്യല്‍, മൊബൈല്‍, ഇന്‍റര്‍നെറ്റ് ബാങ്കിങ് തുടങ്ങിയ നിരവധി കാര്യങ്ങള്‍ ജനങ്ങളെ പഠിപ്പിച്ചതിന്‍െറ ചാരിതാര്‍ഥ്യത്തിലാണ് എന്‍.എസ്.എസ് വളന്‍റിയര്‍മാര്‍. കോളജ് ഓഡിറ്റോറിയത്തില്‍ നടന്ന ചടങ്ങില്‍ പാലോട് രവി എം.എല്‍.എയും ഇ-സാക്ഷരത നേടിയ അപ്പിയമ്മയും ചേര്‍ന്ന് വാര്‍ഡിനെ സമ്പൂര്‍ണ ഇ-സാക്ഷരത വാര്‍ഡായി പ്രഖ്യാപിച്ചു. നഗരസഭാ ചെയര്‍പേഴ്സന്‍ ലേഖസുരേഷ് അധ്യക്ഷത വഹിച്ചു . ഇ-സാക്ഷരതാ പ്രവര്‍ത്തനങ്ങളിലൂടെ പരിശീലനം ലഭിച്ച ഗ്രാമീണര്‍ക്ക് സാങ്കേതിക വിദ്യാഭ്യാസ ഡയറക്ടര്‍ ബിന്ദുവാസുദേവന്‍ സര്‍ട്ടിഫിക്കറ്റുകള്‍ വിതരണം ചെയ്തു. കോളജ് പ്രിന്‍സിപ്പല്‍ എല്‍.എസ്. ബീന, എന്‍.എസ്.എസ് സ്റ്റേറ്റ് കോഓഡിനേറ്റര്‍ അബ്ദുല്‍ജബ്ബാര്‍ , സുഭാഷിണി അമ്മ, മഞ്ചയില്‍ വിക്രമന്‍, ജനാര്‍ദനന്‍നായര്‍ , ഷിബു.ആര്‍.എസ്, ആര്‍.എസ്. ശ്രീമതി, മഞ്ചുഷ, പ്രോഗ്രാം ഓഫിസര്‍ ബി. സുനില്‍കുമാര്‍ എന്നിവര്‍ സംസാരിച്ചു. നഗരസഭയെ സമ്പൂര്‍ണ ഡിജിറ്റല്‍ മുനിസിപ്പാലിറ്റിയാക്കാനുള്ള പ്രവര്‍ത്തനങ്ങള്‍ക്കും തുടക്കം കുറിച്ചു.