വിഴിഞ്ഞം തുറമുഖ നിര്‍മാണം: ഡ്രഡ്ജര്‍ യഥാര്‍ഥ വേഗം കൈവരിച്ചു; മുല്ലൂരില്‍ തീരം രൂപപ്പെടുന്നത് നിമിഷങ്ങള്‍ക്കകം

വിഴിഞ്ഞം: തുറമുഖ നിര്‍മാണത്തിന് കടല്‍ തുരക്കുന്ന ഡ്രഡ്ജര്‍ ‘ശാന്തി സാഗര്‍ -12’ യഥാര്‍ഥ വേഗം കൈവരിച്ചു. മുല്ലൂരില്‍ കടല്‍ പിന്‍വാങ്ങി തീരം രൂപപ്പെടുന്നത് നിമിഷവേഗത്തില്‍. കരയിലേക്ക് മണ്ണ് നിക്ഷേപിക്കാന്‍ നടപടി തുടങ്ങി. ഇതിന് എത്തിച്ച 18 ഷോര്‍ ലൈന്‍ പൈപ്പ് കൂടാതെ 30ഓളം പൈപ്പുകള്‍ വീണ്ടുമത്തെും. തീരത്തെ കണ്ടെയ്നര്‍ ഓഫിസ് സമുച്ചയം ഉടന്‍ സജ്ജമാകും. കഴിഞ്ഞദിവസം വരെ ട്രയല്‍ റണ്‍ ഘട്ടത്തിലായിരുന്ന ഡ്രഡ്ജര്‍ ചൊവ്വാഴ്ചയോടെ പൂര്‍ണതോതില്‍ കടല്‍ ഖനനം തുടങ്ങി. ഇതോടെ കടല്‍ പിന്‍വാങ്ങി തീരം രൂപപ്പെടുന്നതിന്‍െറ വേഗവും വര്‍ധിച്ചു. കാണക്കാണെ തീരം രൂപപ്പെടുന്ന കാഴ്ചയാണിവിടെ. ഡ്രഡ്ജിങ് തുടങ്ങി ഇത്രയും ദിവസത്തിനിടെ ഏതാണ്ട് 300 മീറ്ററോളം ദൂരത്തേക്ക് കടല്‍ പിന്‍വാങ്ങിയിട്ടുണ്ട്. കടല്‍ പിന്നിലേക്കുമാറിയ വിശാല തീരക്കാഴ്ചയാണിവിടെ. രണ്ടുനാളിനുള്ളില്‍ ജി.എസ്.എം രീതിയില്‍ റോഡില്‍ മെറ്റലിങ് നടക്കുമെന്ന് ബന്ധപ്പെട്ടവര്‍ അറിയിച്ചു.