മാലിന്യ സംസ്കരണ കേന്ദ്രത്തിലെ തീ പിടിത്തം: ചാലക്കുടി നഗരസഭക്കെതിരെ പിഴയീടാക്കാൻ ദേശീയ ഹരിത ട്രൈബ്യൂണൽ 

ചാലക്കുടി: നഗരസഭയുടെ പ്ലാസ്​റ്റിക് മാലിന്യ സംസ്കരണ കേന്ദ്രത്തിലുണ്ടായ തീപിടിത്തത്തിൽ നഗരസഭക്കെതിരെ പിഴയീടാക്കാൻ ദേശീയ ഹരിത ട്രൈബ്യൂണൽ നീക്കം. ആറ് മാസം മുമ്പാണ് ശ്​മശാനത്തിന് സമീപത്തെ നഗരസഭയുടെ പ്ലാസ്​റ്റിക് മാലിന്യ സംസ്കരണ കേന്ദ്രത്തിൽ പിടിത്തമുണ്ടായത്. 

വേനൽക്കാലമായതിനാൽ സംസ്കരണത്തിന് ശേഖരിച്ച ടൺ കണക്കിന് പ്ലാസ്​റ്റിക് കത്തി നശിക്കുകയായിരുന്നു. മണിക്കൂറുകൾ നീണ്ട പരിശ്രമത്തിനൊടുവിലാണ്​ അഞ്ചോളം ഫയർഫോഴ്സ്​ യൂനിറ്റുകൾ തീയണച്ചത്. ഇത് പ്രദേശത്ത് അന്തരീക്ഷ മലിനീകരണം സൃഷ്​ടിച്ചിരുന്നു.

തീപിടിത്ത വാർത്തകളെ തുടർന്ന് സംസ്ഥാന മാലിന്യ നിയന്ത്രണ ബോർഡിനോട് ചെന്നൈയിലെ ദേശീയ ഹരിത ട്രൈബ്യൂണൽ സ്വമേധയാ കേസെടുത്ത് വിശദീകരണം തേടിയിരുന്നു. ഇതിനെ തുടർന്ന് മലിനീകരണ നിയന്ത്രണ ബോർഡ് നഗരസഭയിലെ ആരോഗ്യ വിഭാഗം ഉദ്യോഗസ്ഥരോട് വിശദീകരണവും ആവശ്യപ്പെട്ടിരുന്നു. ഖരമാലിന്യം ശേഖരിക്കുന്നതിൽ നഗരസഭക്ക്​ വീഴ്​ച സംഭവിച്ചുവെന്നാണ്​ കണ്ടെത്തൽ. 

ഖരമാലിന്യ സംസ്​കരണത്തിനായി നടപടി സ്വീകരിക്കണമെന്നും അല്ലാത്ത പക്ഷം നഗരസഭക്കെതിരെ നടപടിയെടുക്കുമെന്നും ട്രൈബ്യൂണൽ അറിയിച്ചു. എന്നാൽ നിയമം അനുശാസിക്കുന്ന രീതിയിൽ മാലിന്യശേഖരണം നടത്തുന്നുണ്ടെന്നും കണക്കുകളിൽ പിഴവ് സംഭവിച്ചത് മലിനീകരണ നിയന്ത്രണ ബോർഡിലെ ഉദ്യോഗസ്ഥർക്കാണെന്നും നഗരസഭ വ്യക്തമാക്കി.