വിദ്യാർഥികളെ കയറ്റിയ ഓട്ടോറിക്ഷയിൽ കാർ ഇടിച്ച് മൂന്നു കുട്ടികൾക്ക് പരിക്ക്

തൃശൂർ: കുറുപ്പം റോഡിൽ സ്കൂൾ കുട്ടികളുമായി പോയിരുന്ന ഓട്ടോറിക്ഷ കാറിലിടിച്ച് മൂന്നു വിദ്യാർഥികൾക്കും ഡ്രൈവർക ്കും പരിക്കേറ്റു. സേക്രഡ്ഹാർട്ട് സ്കൂളിലെ ജസീല, പാറമേക്കാവ് വിദ്യാമന്ദിറിലെ വിദ്യാർഥികളായ ഓജസ്, ശ്രീഹരി എന്നിവർക്കും ഓട്ടോ ഡ്രൈവർ ജോസഫിനുമാണ് പരിക്കേറ്റത്. ജസീലക്കും ഓജസിനും കാലിനാണ് പരിക്കേറ്റത്. ഓജസിൻെറ രണ്ടു കാലുകൾക്കും ഒടിവുണ്ട്. ശ്രീഹരിയുടെ തലക്കാണ് പരിക്കേറ്റത്. 13 തുന്നലുകളുണ്ട്. ജോസഫിൻെറ മുഖത്തും പരിക്കേറ്റു. ഇവരെ വിദഗ്ധ ചികിത്സക്കായി മെഡിക്കൽ കോളജ് ആശുപത്രിയിലേക്ക് മാറ്റി. കുറുപ്പം റോഡിൽ വൈകീട്ട് നാലരയോടെയാണ് സംഭവം. റൗണ്ടിൽനിന്ന് കുറുപ്പം റോഡിലേക്കിറങ്ങുകയായിരുന്ന ഓട്ടോറിക്ഷയിൽ മറ്റൊരു വാഹനത്തെ മറികടന്നെത്തിയ കാറാണ് ഇടിച്ചത്. ആറു കുട്ടികളാണ് ഓട്ടോറിക്ഷയിൽ ഉണ്ടായിരുന്നത്. യാത്രക്കാരും വ്യാപാരികളും എത്തി ഉടൻ തന്നെ രക്ഷാപ്രവർത്തനം നടത്തുകയായിരുന്നു.