പരീക്ഷ കഴിഞ്ഞ് ഇറങ്ങിയവര്‍ക്ക് പച്ചക്കറിത്തൈ നല്‍കി യാത്രയയപ്പ്

പുത്തൂര്‍: മാന്ദാമംഗലം സൻെറ് സെബാസ്റ്റ്യന്‍സ് ഹൈസ്‌കൂളിലെ 10ാം ക്ലാസ് പരീക്ഷ കഴിഞ്ഞ് ഇറങ്ങിയ വിദ്യാർഥികള്‍ക്ക് സ്‌കൂള്‍ പി.ടി.എയുടെ വക പച്ചക്കറിത്തൈകള്‍ നല്‍കി യാത്രയാക്കി. പരീക്ഷയുടെ സമാപനദിവസമായ വ്യാഴാഴ്ച രക്ഷാകര്‍ത്താക്കൾ സ്‌കൂള്‍ അങ്കണത്തില്‍ എത്തി. അവസാന മണിയടിച്ചതോടെ രക്ഷാകര്‍ത്താക്കള്‍ കുട്ടികള്‍ക്ക് ഓറഞ്ച് സമ്മാനിച്ചു. തുടര്‍ന്ന് വിദ്യാർഥികള്‍ക്ക് വേനൽക്കാല പച്ചക്കറിത്തൈകള്‍ സമ്മാനിച്ചു. വിദ്യാർഥികള്‍ മനോഹരമായ സ്കൂള്‍ കാലം സമ്മാനിച്ച അധ്യപകരോടും രക്ഷാകര്‍ത്താക്കളോടും നന്ദി പറഞ്ഞു. പരിപാടികള്‍ക്ക് സ്‌കൂള്‍ പി.ടി.എ കമ്മിറ്റി അംഗങ്ങളും പ്രധാനാധ്യാപകന്‍ എം. പീതാംബരനും നേതൃത്വം നല്‍കി.