സംസ്കരണത്തിൽ അപാകത: ചാലക്കുടി അറവുശാല നാട്ടുകാർ ഉപരോധിച്ചു

ചാലക്കുടി: ചന്തയിലെ അറവുശാല മാലിന്യ സംസ്കരണത്തിലെ അപാകതയിൽ പ്രദേശവാസികൾ പ്രതിഷേധിച്ചു. 15 ദിവസത്തിനുള്ളിൽ പ്രശ്നം പരിഹരിക്കുമെന്ന് നഗരസഭ അധികൃതർ ഉറപ്പ് നൽകിയതിനെ തുടർന്ന് സംഘടിച്ചെത്തിയ പ്രദേശവാസികൾ പിരിഞ്ഞു. രാവിലെ ഒമ്പതു മണിയോടെയാണ് പ്രതിഷേധക്കാർ അറവുശാല അടച്ചുപൂട്ടണമെന്ന് ആവശ്യപ്പെട്ട് അതി​െൻറ കവാടം ഉപരോധിച്ചത്. അറവുശാലയിലെ മാലിന്യ സംസ്കരണത്തി​െൻറ ഭാഗമായ ബയോഗ്യാസ് പ്ലാൻറിലെ ചോർച്ച മൂലം മാലിന്യങ്ങൾ പരിസരത്തേക്ക് പരക്കുന്നതായി പ്രദേശവാസികൾ പരാതിപ്പെട്ടു. അറവുശാലക്ക് മൂന്ന് പ്ലാൻറുകൾ ഉണ്ടെങ്കിലും രണ്ടെണ്ണം മാസങ്ങളായി പ്രവർത്തിക്കുന്നില്ല. ഒരു പ്ലാൻറിൽ അമിതമായി മാലിന്യങ്ങൾ സംസ്കരിച്ചതോടെയാണ് ചോർച്ചയുണ്ടായത്. പഴയ പ്ലാൻറുകൾ നന്നാക്കുക പ്രായോഗികമല്ല. പുതിയത് സ്ഥാപിക്കാൻ ഫണ്ടില്ലെന്നതാണ് പ്രതിസന്ധിക്ക് കാരണം.