പടിയൂരില്‍ വീണ്ടും രാഷ്​ട്രീയ സംഘര്‍ഷം; മൂന്ന് പേര്‍ക്ക് പരിക്ക്

ഇരിങ്ങാലക്കുട: പടിയൂരില്‍ വീണ്ടും സി.പി.എം ബി.ജെ.പി സംഘര്‍ഷം. ഞായറാഴ്ച വൈകിട്ടാണ് സംഭവം. ഇരുവിഭാഗങ്ങൾ തമ്മിലുണ്ടായ സംഘട്ടനത്തിൽ ബി.ജെ.പി പ്രവര്‍ത്തകനായ വിരുത്തിപറമ്പില്‍ രജീഷ്, എല്‍.ഡി.എഫ് പ്രവര്‍ത്തകരായ ഇളംതുരുത്തി സുദാമ​െൻറ മകന്‍ സൂരജ് (14), വില്ലാര്‍വട്ടം പുരുഷോത്തമ​െൻറ മകൻ വിഷ്ണു (16) എന്നിവര്‍ക്കാണ് പരിക്കേറ്റത്. ഇവരെ ഇരിങ്ങാലക്കുട താലൂക്ക് ആശുപത്രിയില്‍ പ്രവേശിപ്പിച്ചു. മാസങ്ങളായി ഈ പ്രദേശത്ത് രാഷ്ട്രീയ സംഘര്‍ഷങ്ങള്‍ തുടരുകയാണ്. വൈക്കം ക്ഷേത്രത്തിലെ പൂയത്തിനിടയിലും, തുടര്‍ന്ന് വിഷുവി​െൻറ തലേദിവസം ഉണ്ടായസംഘര്‍ഷം ഒരാഴ്ചയോളം തുടർന്നിരുന്നു. പ്രചാരണ ബോർഡുകൾ നശിപ്പിച്ചതിനെത്തുടർന്നാണ് പടിയൂരില്‍ സംഘർഷം ആരംഭിച്ചത്. പൊലീസി​െൻറ ക്രിയാത്മകമായ ഇടപെടല്‍ ഇല്ലാത്തതാണ് രാഷ്ട്രീയ സംഘര്‍ഷത്തിന് അയവു വരുത്താത്തതിന് കാരണമെന്ന് നാട്ടുകാർ പരാതിപ്പെട്ടു. പടിയൂരില്‍ സമാധാനാന്തരീക്ഷം സൃഷ്ടിക്കുന്നതിന് സാഹചര്യം ഉണ്ടാക്കണമെന്ന് യു.ഡി.എഫ് ആവശ്യപ്പെട്ടിരുന്നുവെങ്കിലും സര്‍വകക്ഷിയോഗം വിളിച്ചു ചേര്‍ക്കുന്നതിനോ, സമാധാനാന്തരീക്ഷം കൈവരിക്കുന്നതിനോ ആരും മുതിരുന്നില്ല.