ഗവ.എൻജിനീയറിങ് കോളജിലെ മഞ്ഞപ്പിത്തം^ ആരോഗ്യവകുപ്പ് ഡയറക്ടർ റിപ്പോർട്ട് ആവശ്യപ്പെട്ടു

ഗവ.എൻജിനീയറിങ് കോളജിലെ മഞ്ഞപ്പിത്തം- ആരോഗ്യവകുപ്പ് ഡയറക്ടർ റിപ്പോർട്ട് ആവശ്യപ്പെട്ടു തൃശൂർ: ഗവ. എൻജിനീയറിങ് കോളജിൽ മഞ്ഞപ്പിത്തം പടരുന്നതിനെ കുറിച്ച് ഉടന്‍ റിപ്പോര്‍ട്ട് നല്‍കണമെന്ന് ആരോഗ്യവകുപ്പ് ഡയറക്ടര്‍ നിർദേശം നല്‍കി. ആരോഗ്യ വകുപ്പ് ഡയറക്ടര്‍, ഡി.എം.ഒയുടെ ചുമതല നിർവഹിക്കുന്ന ഡെപ്യൂട്ടി ഡി.എം.ഒ ഡോ. ബേബിലക്ഷ്മിയോട് ഫോണിലൂടെയാണ് ഇക്കാര്യം ആവശ്യപ്പെട്ടത്. മഞ്ഞപ്പിത്തം പടരുന്നതുമൂലം കോളജ് ഹോസ്റ്റൽ വിദ്യാർഥികൾ ദുരിതം അനുഭവിക്കുകയാണെന്നും രോഗഭീഷണി മേഖലയില്‍ വ്യാപകമാണെന്നും ചൂണ്ടിക്കാട്ടി മാധ്യമങ്ങള്‍ റിപ്പോര്‍ട്ട് ചെയ്തിരുന്നു. ഇതേ തുടര്‍ന്നാണ് ഡി.എം.ഒ. യുടെ നിർദേശപ്രകാരം ഗവ. മെഡിക്കല്‍ കോളജിലെ കമ്യൂണിറ്റി ഹെല്‍ത്ത് മേധാവി ഡോ. നിലീന കോശിയുടെ നേതൃത്വത്തിലുള്ള ഇരുപത്തഞ്ചോളം വരുന്ന മെഡിക്കല്‍ സംഘം വെള്ളിയാഴ്ച കാമ്പസില്‍ പരിശോധന നടത്തിയത്. അടിയന്തരമായി റിപ്പോര്‍ട്ട് നല്‍കാന്‍ മെഡിക്കല്‍ സംഘത്തോട് ആവശ്യപ്പെട്ടിട്ടുണ്ടെന്നും റിപ്പോര്‍ട്ട് കിട്ടിയാല്‍ ഉടന്‍ ആവശ്യമായ നടപടികള്‍ സ്വീകരിക്കുമെന്നും ഡോ. ബേബിലക്ഷ്മി പറഞ്ഞു.