കാത്തലിക് സിറിയൻ ബാങ്ക്: ഓഫിസർമാരെ പിരിച്ചു വിടില്ല

തൃശൂർ: 82 പ്രബേഷണറി ഓഫിസർമാരെ പിരിച്ചുവിടാനുള്ള തീരുമാനത്തിൽ നിന്ന് കാത്തലിക് സിറിയൻ ബാങ്ക് പിന്മാറി. പിരിച്ചു വിടൽ തീരുമാനം ബാങ്ക് മാനേജ്മ​െൻറും ജീവനക്കാരും തമ്മിലുള്ള പോരാട്ടത്തിലേക്ക് വഴി തുറന്ന സാഹചര്യത്തിൽ നാടകീയമായാണ് മാനേജ്മ​െൻറി​െൻറ നയം മാറ്റം. ബുധനാഴ്ച അസാധാരണ ജനറൽ ബോഡി ചേരുന്നതി​െൻറ മുന്നോടിയായി അവസാന നിമിഷ ചർച്ചയിൽ മാനേജ്മ​െൻറ് ജീവനക്കാരുടെ സംഘടനകൾക്ക് വഴങ്ങുകയായിരുന്നു. തിങ്കളാഴ്ച ബാങ്കിലെ ജീവനക്കാരുടെ സംഘടനകളും മാനേജ്മ​െൻറും തമ്മിൽ നടന്ന ചർച്ച പരാജയപ്പെട്ടിരുന്നു. ചൊവ്വാഴ്ച വൈകീട്ട് ചെയർമാൻ ടി.എസ്. അനന്തരാമനും മാനേജിങ് ഡയറക്ടർ സി.വി.ആർ. രാജേന്ദ്രനും ഡയറക്ടർമാരും വീണ്ടും സംഘടനകളുമായി ചർച്ച നടത്തുകയായിരുന്നു. ഇൗ ചർച്ചയിലാണ് പ്രബേഷണറി ഓഫിസർമാരെ പിരിച്ചു വിടില്ലെന്ന് മാനേജ്മ​െൻറ് പ്രതിനിധികൾ അറിയിച്ചത്. ആറ് മാസത്തിനകം അവരെ സ്ഥിരപ്പെടുത്തും. ജോലിയിൽ മികവ് പുലർത്താൻ സംഘടനകൾ അവരെ സഹായിക്കാമെന്ന് ഏറ്റു. കൂടാതെ പിരിച്ചുവിടലിനെതിരെ നടന്ന പ്രതിഷേധങ്ങളുടെ പേരിൽ ആർക്കെതിരെയും പ്രതികാര നടപടി ഉണ്ടാവില്ലെന്നും മാനേജ്മ​െൻറ് ഉറപ്പു നൽകി. ഇതോടെ ആഴ്ചകളായി ബാങ്കിനെ നീറ്റിക്കൊണ്ടിരുന്ന ഒരു പ്രശ്നത്തിന് തൽക്കാലം പരിഹാരമായി. അതേസമയം, ബാങ്കി​െൻറ 51 ശതമാനം ഓഹരി കനേഡിയൻ സ്ഥാപനമായ ഫെയർ ഫാക്സിന് കൈമാറാനുള്ള തീരുമാനം നയപരമായതിനാൽ പിന്മാറാനാവില്ലെന്ന് മാനേജ്മ​െൻറ് വ്യക്തമാക്കി. ബാങ്കി​െൻറ തനിമ നിലനിർത്താൻ വേണ്ട വ്യവസ്ഥകൾ കൊണ്ടുവരാൻ ശ്രമിക്കുമെന്നും ജീവനക്കാരുടെ സംഘടനാ പ്രതിനിധികളോട് പറഞ്ഞു. ഈ സാഹചര്യത്തിൽ, ബുധനാഴ്ച ബാങ്കി​െൻറ അസാധാരണ ഡയറക്ടർ ബോർഡ് യോഗം ചേരുന്ന തൃശൂർ കൗസ്തുഭം ഓഡിറ്റോറിയത്തിലേക്ക് സമര സഹായ സമിതി നടത്താനിരുന്ന പ്രതിഷേധ മാർച്ച് ഉപേക്ഷിച്ചതായി ബന്ധപ്പെട്ടവർ അറിയിച്ചു. ഫെയർ ഫാക്സിന് ഓഹരി കൈമാറ്റവും ബാങ്കിൽ നേരിട്ടുള്ള വിദേശ മൂലധന നിക്ഷേപ പരിധി 49 ൽ നിന്ന് 74 ശതമാനമായി ഉയർത്തലുമാണ് ഇന്നത്തെ ജനറൽ ബോഡിയിൽ അംഗീകാരത്തിന് വെക്കുന്നത്.