പരീക്ഷ പേപ്പർ കയറ്റിയ സർവകലാശാല വാഹനം കെ.എസ്.യു തടഞ്ഞു

തൃശൂർ: തുടർച്ചയായ ദിവസങ്ങളിൽ പരീക്ഷ നടത്തുന്നതിൽ പ്രതിഷേധിച്ച് ഗവ.ലോ കോളജിലെ കെ.എസ്.‍യു വിദ്യാർഥികൾ പരീക്ഷ പേപ്പറുമായെത്തിയ സർവകലാശാല വാഹനം തടഞ്ഞു. പൊലീസ് സ്ഥലത്തെത്തി വിദ്യാർഥികളെ നീക്കം ചെയ്തു. കഴിഞ്ഞ മാസം മുതൽ തുടങ്ങിയ മുപ്പതോളം പരീക്ഷകളാണ് ഇടവേളയില്ലാതെ നടക്കുന്നത്. അഞ്ചാം വർഷ ബി.ബി.എ എൽ.എൽ.പിയിലെ നാല്, രണ്ട്, ആറ്, എട്ട്, പത്ത് സെമസ്റ്ററുകളിലെ പരീക്ഷകളും അടുത്തടുത്ത ദിവസങ്ങളിലായി ഇടവേളകളില്ലാതെയാണ് നടന്നത്. ഹോസ്റ്റൽ സൗകര്യം ഇല്ലാത്ത തൃശൂർ ലോ കോളജിൽ 60 ശതമാനം വിദ്യാർഥികളും ജില്ലക്ക് പുറത്തുള്ളവരാണ്. സമയക്രമത്തിൽ മാറ്റം വരുത്തണമെന്നാവശ്യപ്പെട്ട് കെ.എസ്.യു സർവകലാശാലക്ക് പരാതി നൽകിയെങ്കിലും ഫലമുണ്ടായില്ല. ഈ സാഹചര്യത്തിലാണ് പ്രതിഷേധമെന്ന് പ്രവർത്തകർ പറഞ്ഞു. ജില്ല സെക്രട്ടറി വി.എസ്. ഡേവിഡ്, യൂനിറ്റ് പ്രസിഡൻറ് അദ്വൈത് ദാമോദരൻ, ക്രിസ്റ്റഫർ ജോസ്, തുഷാർ കൃഷ്ണ, ജെറിൻ അരവിന്ദ്, ജസ്ന എന്നിവരുടെ നേതൃത്വത്തിലായിരുന്നു പ്രതിഷേധം. തളിക്കുളം ബ്ലോക്ക് പഞ്ചായത്തംഗം കെ.ജെ. യദുകൃഷ്ണ, എ.വി. യദുകൃഷ്ണൻ, ക്ലാസ് പ്രതിനിധി ജെസ്റ്റോപോൾ, എബിമോൻ തണ്ടാശേരി എന്നിവരെ വെസ്റ്റ് എസ്.ഐ അനീഷി​െൻറ നേതൃത്വത്തിൽ അറസ്റ്റ് ചെയ്തു നീക്കി. പരീക്ഷാ നടത്തിപ്പിലെ അപാകത പരിഹരിച്ചില്ലെങ്കിൽ കെ.എസ്.യു സർവകലാശാലയിലേക്ക് മാർച്ച് നടത്തുമെന്ന് സംസ്ഥാന വൈസ് പ്രസിഡൻറ് നിഖിൽ ദാമോദരൻ, ജില്ല പ്രസിഡൻറ് മിഥുൻ മോഹൻ എന്നിവർ അറിയിച്ചു.