റെയിൽവേ നൈറ്റ് പട്രോൾ കരാർവത്​കരണം​; സമരം അവസാനിപ്പിച്ചു

തൃശൂർ: റെയിൽവേയിലെ നൈറ്റ് പട്രോൾ കരാർവത്കരണത്തിനെതിരെ സംയുക്ത സമരസമിതി നേതൃത്വത്തിൽ 11 ദിവസമായി നടത്തിയ സത്യഗ്രഹ സമരം അവസാനിപ്പിച്ചു. തൊഴിലാളികളെ സുരക്ഷാ ഡ്യൂട്ടിയിൽനിന്നും ഒഴിവാക്കണമെന്ന ആവശ്യം അംഗീകരിച്ച സാഹചര്യത്തിൽ സമരം വിജയിച്ചതായി സമര സമിതി കൺവീനർ പി.ആർ. ഗോപാലകൃഷ്ണൻ അറിയിച്ചു. സമാപന യോഗം സി.ഐ.ടി.യു സംസ്ഥാന കമ്മിറ്റിയംഗം ബാബു എം. പാലിശേരി ഉദ്ഘാടനം ചെയ്തു. എം.എഫ് നിക്സൺ അധ്യക്ഷത വഹിച്ചു. എച്ച്.എം.എസ് സംസ്ഥാന സെക്രട്ടറി വി. ജയകുമാർ, ഡി.ആർ.കെ.എസ് ഓർഗനൈസിങ് സെക്രട്ടറി മധുസൂദനൻ, ഡി.ആർ.ഇ.യു ഡിവിഷനൽ പ്രസിഡൻറ് എൻ.രവികുമാർ, സി.ഐ.ടി.യു ഏരിയ സെക്രട്ടറി സുധാകരൻ, എം.എൽ. വിബി, എം.ആർ. സുധീഷ് എന്നിവർ സംസാരിച്ചു.