മഴക്കാല രോഗപ്രതിരോധം: പുന്നയൂരിൽ ​ആരോഗ്യ ക്യാമ്പുകളും ബോധവത്​കരണവും

പുന്നയൂർ: മഴക്കാല രോഗപ്രതിരോധ പ്രവർത്തനങ്ങളുടെ ഭാഗമായി എടക്കഴിയൂർ കുടുബാരോഗ്യ കേന്ദ്രത്തിൽ വിളിച്ചുചേർത്ത ആരോഗ്യപ്രവർത്തകരുടെയും ആശാവർക്കർമാരുടെയും യോഗം പഞ്ചായത്ത് പ്രസിഡൻറ് എം.കെ. ഷഹർബാൻ ഉദ്ഘാടനം ചെയ്തു. ഹോമിയോ ഡോക്ടറുടെ നേതൃത്വത്തില്‍ 20 വാർഡുകളിലും സ്കൂളുകളിലും ഹോമിയോ മരുന്ന് വിതരണം നടത്താൻ തീരുമാനിച്ചു. ആയുർവേദ ഡോക്ടറുടെ നേതൃത്വത്തില്‍ നാല് മെഡിക്കല്‍ ക്യാമ്പുകള്‍‌ തീരദേശ മേഖലയിലും ഒരെണ്ണം കിഴക്കന്‍ മേഖലയിലുമായി സംഘടിപ്പിക്കും. വീടുകള്‍ തോറും അംഗന്‍വാടി വർക്കർമാർ, കുടുംബശ്രീ പ്രവർത്തകർ, ആരോഗ്യ പ്രവർത്തകർ, ആശാ വർക്കർമാർ, തൊഴിലുറപ്പ് തൊഴിലാളികള്‍ എന്നിവരുൾപ്പെടുന്ന സംഘം ബോധവത്കരണം നടത്തും. വൈസ് പ്രസിഡൻറ് ആർ.പി. ബഷീർ അധ്യക്ഷത വഹിച്ചു. ജില്ല പഞ്ചായത്ത് അംഗം ടി.എ. ഐഷ, സ്ഥിരം സമിതി അധ്യക്ഷരായ ഷാജിത അഷ്റഫ്, ഐ.പി. രാജേന്ദ്രന്‍, സീനത്ത് അഷ്റഫ്, പഞ്ചായത്ത് അംഗങ്ങളായ ബുഷറ കുന്നമ്പത്ത്, ഹസന്‍ തൈക്കൂട്ടത്തില്‍, അഷ്റഫ് മൂത്തേടത്ത്, ഷമീം അഷ്റഫ്, സുമ വിജയന്‍ എന്നിവ‍ർ പങ്കെടുത്തു.