പ്രവേശനോത്സവത്തിന്​ ചിത്രക്കുടകളൊരുങ്ങി

തൃശൂർ: കേരള ലളിതകലാ അക്കാദമി സ്‌കൂള്‍ പ്രവേശനോത്സവത്തോടനുബന്ധിച്ച് അയ്യന്തോള്‍ ഗവ. ഹൈസ്‌കൂളില്‍ സംഘടിപ്പിക്കുന്ന 'ചിത്രക്കുട -ചിത്രത്തണല്‍' പരിപാടിക്കുള്ള കുടകള്‍ തയാറായി. വെള്ളിയാഴ്ച ഉച്ചക്ക് 12.30ന് മന്ത്രി വി.എസ്. സുനില്‍കുമാര്‍ കുട വിതരണം ചെയ്ത് ഉദ്ഘാടനം നിർവഹിക്കും. സ്‌കൂളിലെ ഒന്നു മുതല്‍ പത്ത് വരെ മുഴുവന്‍ കുട്ടികള്‍ക്കും ചിത്രങ്ങള്‍ ആലേഖനം ചെയ്ത കുടകള്‍ വിതരണം ചെയ്യും. എല്‍.പി., യു.പി, ഹൈസ്‌കൂള്‍ എന്നിങ്ങനെ മൂന്ന് ഭാഗമായി തിരിച്ചാണ് വിതരണം . അന്നേ ദിവസം സ്‌കൂള്‍ അങ്കണത്തില്‍ ചിത്രരചന നടത്തുകയും ചിത്രരചന കാണുന്നതിനുമുള്ള സൗകര്യം ഒരുക്കുകയും ചെയ്യും. മഴയും വെയിലും പ്രതിരോധിക്കാനുള്ള കുട ചിത്രം കൂടിയായി മാറുന്നതോടെ ചിത്രം സഞ്ചരിക്കുന്ന ഒരു കലാവസ്തുവായി മാറ്റുക എന്ന നൂതന ആശയം കൂടി ഇതിനു പിന്നിലുണ്ട്. ഒരുപക്ഷേ ഇന്ത്യയിലാദ്യമായിട്ടാകാം 'ചിത്രക്കുട' എന്ന ആവിഷ്‌കാരം അരങ്ങേറുന്നത്.