ബസിടിച്ച് ബൈക്ക് യാത്രികന് പരിക്ക്

കുന്നംകുളം: ചൂണ്ടൽ സ​െൻററിൽ സ്വകാര്യ ബസിടിച്ച് ബൈക്ക് യാത്രികന് പരിക്കേറ്റു. വേലൂർ അറങ്ങാശേരി സേവിക്കാണ് (53) പരിക്കേറ്റത്. ഇയാളെ അമല ആശുപത്രിയിൽ പ്രവേശിപ്പിച്ചു. സിഗ്‌നൽ ലൈറ്റ് പ്രവർത്തിക്കാത്തതാണ് അപകടത്തിന് കാരണമായത്. ഗുരുവായൂർ റോഡിൽ നിന്ന് തൃശൂർ റോഡിലേക്ക് ബൈക്ക് യാത്രികൻ പ്രവേശിക്കുന്നതിനിടയിലാണ് തൃശൂരിൽനിന്ന് കുന്നംകുളത്തേക്ക് വരികയായിരുന്ന പി.എ.ആർ (സുബിൽ) ബസ് ഇടിച്ചത്. നിയന്ത്രണംവിട്ട ബസ് ജങ്ഷനിലെ ഡിവൈഡറിൽ ഇടിച്ചു കയറി. തുടർന്ന് ഡ്രൈവർ ഓടി രക്ഷപ്പെട്ടു. ശനിയാഴ്ച വൈകീട്ട് മൂന്നോടെയായിരുന്നു അപകടം. ബൈക്ക് യാത്രികൻ ഹെൽമറ്റ് ധരിച്ചിരുന്നതിനാൽ വൻ ദുരന്തം ഒഴിവായി. ജങ്ഷനിൽ ഏതാനും ആഴ്ചകളായി സിഗ്നൽ തകരാറിലാണ്. അടിയന്തരമായി നടപടി വേണമെന്ന ആവശ്യം നാട്ടുകാർ ഉയർത്തിയിരുന്നു. കുന്നംകുളം പൊലീസ് ബസ് കസ്റ്റഡിയിലെടുത്തു.