ലോറി സമരം: പൊലീസ്​ സംരക്ഷണം നൽകണം

തൃശൂർ: ഒരാഴ്ചയായി തുടരുന്ന ചരക്ക് ലോറി സമരം കാരണം കോഴിത്തീറ്റ ലഭിക്കാത്തതിനാൽ സംസ്ഥാനത്ത് കോഴി കർഷകർ ഗുരുതര പ്രതിസന്ധി നേരിടുകയാണെന്ന് കേരള പൗൾട്രി ഫാർമേഴ്സ് േട്രഡേഴ്സ് സമിതി സംസ്ഥാന പ്രസിഡൻറ് ബിന്നി ഇമ്മട്ടി പ്രസ്താവനയിൽ പറഞ്ഞു. കോഴിത്തീറ്റക്ക് ഇതര സംസ്ഥാനങ്ങളെയാണ് ആശ്രയിക്കുന്നത്. ഒരാഴ്ചയായി തീറ്റ വരവ് നിലച്ചിരിക്കുകയാണ്. ശക്തമായ മഴ കാരണം ഫാമുകളിൽ തീറ്റ ശേഖരിക്കാൻ പറ്റുന്നില്ല. ആവശ്യത്തിന് തീറ്റ നൽകിയില്ലെങ്കിൽ കോഴികൾക്ക് നാശം സംഭവിക്കും. പച്ചക്കറി, പലചരക്ക് തുടങ്ങിയ എല്ലാ നിത്യോപയോഗ സാധനങ്ങൾക്കും കടുത്ത ക്ഷാമവും വിലവർധനയുമാണ്. ഭക്ഷണ സാധനങ്ങൾ യഥേഷ്ടം സംസ്ഥാനത്ത് എത്തിക്കാൻ മതിയായ പൊലീസ് സംരക്ഷണം നൽകണമെന്നും ലോറി ഉടമകളുടെ ന്യായമായ ആവശ്യങ്ങൾ അനുഭാവപൂർവം പരിഗണിച്ച് സമരം അടിയന്തരമായി ഒത്തുതീർപ്പാക്കാൻ കേന്ദ്ര-സംസ്ഥാന സർക്കാറുകൾ തയാറാകണമെന്നും അദ്ദേഹം ആവശ്യപ്പെട്ടു.