കവർച്ച: സൈബര്‍ സെല്ലി​െൻറ സഹായം തേടി പൊലീസ്

തൃശൂർ: തൈക്കാട്ടുശ്ശേരിയിൽ പൂട്ടിയിട്ട വീട്ടിൽനിന്ന് 50 പവനും ലക്ഷം രൂപയും കവർന്ന കേസ് അന്വേഷണത്തിന് പൊലീസ് സൈബര്‍ സെല്ലി​െൻറ സഹായം തേടി. മോഷണം നടന്ന് മൂന്ന് ദിവസം പിന്നിട്ടിട്ടും അന്വേഷണ സംഘത്തിന് ഒരു തുമ്പും ലഭിക്കാത്തതിനെ തുടര്‍ന്നാണ് സൈബര്‍ സെല്ലി​െൻറ സഹായം തേടിയത്. സി.സി.ടി.വി കാമറയില്‍നിന്ന് ലഭിച്ച ദൃശ്യങ്ങളുടെ അടിസ്ഥാനത്തില്‍ സംശയമുള്ളവരെ ചോദ്യംചെയ്തുവെങ്കിലും കാര്യമായ പുരോഗതി ലഭിക്കാത്തതിനെ തുടര്‍ന്ന് വീട്ടുകാരുമായി അടുപ്പമുള്ളവരിലേക്കും അന്വേഷണം വ്യാപിപ്പിച്ചിരുന്നു. മോഷണം നടന്ന വീടി​െൻറ പുറകുവശത്തെ വാതില്‍ തുറന്ന് കിടന്നത് എങ്ങനെയെന്നതാണ് അന്വേഷണ സംഘത്തെ കുഴയ്ക്കുന്നത്. എ.സി.പി വി.കെ. രാജുവി​െൻറ നേതൃത്വത്തിലാണ് അന്വേഷണം. ഞായറാഴ്ച പട്ടാപ്പകൽ വടക്കൂട്ട് ബാലകൃഷ്ണ​െൻറ വീട്ടില്‍നിന്നാണ് മോഷണം പോയത്. അതേസമയം നെല്ലിക്കുന്ന് സഹോദരങ്ങളുടെ വീട്ടില്‍ നടന്ന മോഷണവുമായി ബന്ധപ്പെട്ട് അന്വേഷണവും പുരോഗമിക്കുകയാണ്.