'ദുരിതാശ്വാസ ക്യാമ്പുകൾ മഹല്ല് ഏറ്റെടുക്കും'

മേത്തല: ലോകമലേശ്വരം, മേത്തല വില്ലേജുകളിലെ ദുരിതാശ്വാസ ക്യാമ്പുകൾ ചേരമാൻ ജുമാ മസ്ജിദ് മഹല്ല് ഏറ്റെടുക്കും. മഹല്ല് പരിധിയിലെ രണ്ട് വില്ലേജുകളിലെ ദുരിതാശ്വാസ ക്യാമ്പുകളിലെ ചെലവുകൾ ചേരമാൻ മഹല്ലിലെ മദ്റസകളിലെ വിദ്യാർഥികൾ ഏറ്റെടുക്കുമെന്ന് മഹല്ല് പ്രസിഡൻറ് ഡോ. പി.എ. മുഹമ്മദ് സഈദ്, സെക്രട്ടറി എസ്.എ. അബദുൽ ഖയ്യൂം എന്നിവർ അറിയിച്ചു. മഹല്ലിലെ എട്ട് മദ്റസകളിലെ കുട്ടികൾ രണ്ട് നേരത്തെ ഭക്ഷണം ക്യാമ്പ് അംഗങ്ങൾക്ക് നൽകാനാണ് തീരുമാനം. മേത്തല ബാലാനുബോധിനി സ്കൂളിലെ ക്യാമ്പിലേക്ക് അത്യാവശ്യമായ പുൽപായ തുടങ്ങിയവ മഹല്ല് കമ്മിറ്റി ക്യാമ്പിൽ എത്തിച്ചു. ക്യാമ്പിൽ വൈദ്യസഹായത്തിനുള്ള അടിയന്തര കാര്യങ്ങൾ മഹല്ല് ഏറ്റെടുക്കുമെന്നും ഭാരവാഹികൾ അറിയിച്ചു.