റോഡുകളുടെ ശോച്യാവസ്​ഥ പരിഹരിക്കണം -വെൽ​​ഫെയർ പാർട്ടി

തൃശൂര്‍: ജില്ലയിലെ റോഡുകളുടെ ശോച്യാവസ്ഥ ഉടന്‍ പരിഹരിക്കണമെന്ന് വെല്‍ഫെയര്‍ പാര്‍ട്ടി ജില്ല പ്രസിഡൻറ് എം.കെ. അസ്ലം ആവശ്യപ്പെട്ടു. രണ്ട് ജീവനാണ് കഴിഞ്ഞ ദിവസം തകര്‍ന്ന റോഡില്‍ പൊലിഞ്ഞത്. ഒരാഴ്ചക്കിടെ റോഡപകടത്തിൽ ഏഴുപേർ മരിച്ചു. റോഡുകള്‍ സഞ്ചാര യോഗ്യമാക്കണമെന്ന് ആവശ്യപ്പെട്ട് ജനം നടത്തുന്ന പ്രക്ഷോഭങ്ങളെ ജില്ല ഭരണകൂടം അവഗണിക്കുകയാണ്. ജില്ലയിലെ എം.എല്‍.എമാർ അടക്കമുള്ള ജനപ്രതിനിധികള്‍ ഇക്കാര്യത്തിൽ കടുത്ത അനാസ്ഥയാണ് കാണിക്കുന്നത്. തൃശൂര്‍-കാഞ്ഞാണി-വാടാനപ്പള്ളി റോഡ്, പൂങ്കുന്നം-കുറ്റിപ്പുറം റോഡ്, ചാലക്കുടി പോട്ട-എലിഞ്ഞിപ്ര റോഡ്, ചാവക്കാട്-ചേറ്റുവ റോഡ് തുടങ്ങി ജില്ലയിലെ പ്രധാനപ്പെട്ട നിരവധി റോഡുകള്‍ തകര്‍ന്ന് സഞ്ചാരയോഗ്യമല്ലാതായി. പുഴയ്ക്കലില്‍ റോഡുകള്‍ കുഴിയായതിനു പുറമെ ഗതാഗതക്കുരുക്ക് പതിവായി. ചാവക്കാട്-ചേറ്റുവ റോഡി​െൻറ അവസ്ഥ പാര്‍ട്ടി നേതാക്കള്‍ വകുപ്പ് മന്ത്രിയെ നേരിട്ട് ബോധിപ്പിക്കുകയും അറ്റകുറ്റപ്പണി ഉടന്‍ നിര്‍വഹിക്കുമെന്ന് ഉറപ്പ് ലഭിക്കുകയും ചെയ്തതാണ്. റോഡുകൾ നന്നാക്കാൻ കലക്ടറുടെ ഭാഗത്തുനിന്ന് ഉൗർജിത ശ്രമം വേണമെന്നും ആവശ്യപ്പെട്ടു.