പെരിഞ്ഞനം എക്സ്ചേഞ്ച് റോഡില്‍ വെള്ളക്കെട്ട് 20 കുടുംബങ്ങള്‍ ദുരിതത്തില്‍

കയ്പമംഗലം: പെരിഞ്ഞനം ആറാം വാര്‍ഡില്‍ ടെലിഫോണ്‍ എക്സ്ചേഞ്ചില്‍നിന്ന് കുറ്റിലക്കടവിനെ ബന്ധിപ്പിക്കുന്ന എന്‍.എം. യൂസഫ്‌ റോഡില്‍ വെള്ളക്കെട്ട്. 20 കുടുംബങ്ങള്‍ പുറത്തിറങ്ങാന്‍ കഴിയാതെ വലയുന്നു. ഈ റോഡിനോട് ചേര്‍ന്ന ഊക്കന്‍വളവി​െൻറ തെക്കേ വളവിലാണ് ലിങ്ക് റോഡില്‍ കാനയില്ലാത്തത് മൂലം വെള്ളം ഒഴുകിപ്പോകാതെ കെട്ടി നില്‍ക്കുന്നത്. പള്ളിപറമ്പില്‍ സാജുദ്ദീ​െൻറ വീട് പൂര്‍ണമായി വെള്ളത്തിലാണ്. പുറത്തേക്ക് നടന്നുപോകാനായി ഇവിടെ മീന്‍ പെട്ടികള്‍ ഇട്ടിരിക്കുകയാണ്. സമീപത്തെ വീടുകളിലും ഇതുതന്നെ സ്ഥിതി. നിരവധി തവണ പഞ്ചായത്തിലും ഗ്രാമസഭയിലും പരാതി ഉന്നയിച്ചെങ്കിലും അടുത്ത വേനലില്‍ ശരിയാക്കാം എന്ന വാഗ്ദാനം മാത്രമെ ലഭിക്കാറുള്ളൂ എന്ന് നാട്ടുകാര്‍ പറയുന്നു.