തെരുവുനായ്​ കടിയേറ്റ് കുഞ്ഞുൾപ്പെടെ രണ്ടുപേർക്ക് പരിക്ക്

ഗുരുവായൂര്‍: മുറ്റത്ത് കളിച്ചിരുന്ന പിഞ്ചുകുഞ്ഞിനും കോളജിൽനിന്ന് മടങ്ങിയിരുന്ന വിദ്യാർഥിനിക്കും തെരുവുനായുടെ കടിയേറ്റു. നഗരസഭയുടെ ട്രഞ്ചിങ് ഗ്രൗണ്ടിന് സമീപം ഇരിങ്ങപ്പുറത്ത് വ്യാഴാഴ്ച ഉച്ചക്ക് 1.30നാണ് തെരുവുനായുടെ ആക്രമണം. അമ്പലത്തുവീട്ടിൽ റിൻഷാദി​െൻറ മകൻ ഇയാനാണ് (നാല്) ആദ്യം കടിയേറ്റത്. ഇയാൻ മുറ്റത്ത് കളിച്ചുകൊണ്ടിരിക്കെയാണ് നായ ആക്രമിച്ചത്. പരിസരവാസികൾ ബഹളം വെച്ചതോടെ ഓടിയ നായ കിഴക്കേപുരക്കൽ രാധാകൃഷ്ണ​െൻറ മകൾ രഞ്ജുഷയെ (18) കടിച്ച് പരിക്കേൽപ്പിച്ചു. രഞ്ജുഷ കോളജിൽനിന്ന് മടങ്ങുകയായിരുന്നു. ഇരുവരെയും തൃശൂർ മെഡിക്കൽ കോളജിൽ പ്രവേശിപ്പിച്ചു.