ഒല്ലൂരിലെ റോഡ്​: നരഹത്യക്ക്​ കേസെടുക്കണമെന്ന്​ പരാതി

തൃശൂർ: ഒല്ലൂരിൽ മനുഷ്യ ജീവൻ അപകടപ്പെടുത്തുന്ന വിധത്തിൽ റോഡിന് നടുവിൽ പൊളിച്ചിടാൻ നിർദേശം നൽകിയ ഉദ്യോഗസ്ഥർക്കെതിരെ നരഹത്യക്ക് കേസെടുക്കണമെന്ന് ആവശ്യപ്പെട്ട് പൊലീസിൽ പരാതി. ഡി.സി.സി ജനറൽ സെക്രട്ടറി ഷാജി ജെ. കോടങ്കണ്ടത്താണ് സിറ്റി പൊലിസ് കമീഷണർക്ക് പരാതി നൽകിയത്. അശാസ്ത്രീയമായി, സുരക്ഷ മാനദണ്ഡം പാലിക്കാതെയാണ് കമ്പനിപ്പടി മുതൽ വ്യവസായ കേന്ദ്രം വരെ റോഡ് പൊളിച്ചത്. പൈപ്പിടാൻ ഇത്തരത്തിൽ റോഡ് പൊളിക്കേണ്ട ആവശ്യമില്ല. പൊളിച്ച ഭാഗം കുഴിയടക്കാൻ ശ്രദ്ധിച്ചതുമില്ല. ഇത് അപകട മരണത്തിനും ഇടയാക്കി. ഉദ്യോഗസ്ഥരുടെ കുറ്റകരമായ അനാസ്ഥയാണ് ഇതിന് ഇടയാക്കിയതെന്ന് ഷാജി കോടങ്കണ്ടത്ത് പരാതിയിൽ പറഞ്ഞു.