കലോത്സവത്തെ നെഞ്ചേറ്റി പൂര നഗരി

കലോത്സവത്തെ നെഞ്ചേറ്റി പൂരനഗരി തൃശൂർ: ഒഴിവുദിവസം ആഘോഷിക്കാൻ ആളുകൾ ഞായറാഴ്ച കലോത്സവനഗരിയിലേക്ക് ഒഴുകിയെത്തി. കലോത്സവത്തി‍​െൻറ രണ്ടാം ദിവസത്തിൽ എല്ലാ വേദികൾക്കു മുന്നിലും മികച്ച ജനപങ്കാളിത്തമായിരുന്നു. കുടുംബത്തോടെ കലോത്സവം കാണാനായി രാവിലെ എത്തി‍യ പലരും രാത്രി വൈകിയാണ് മടങ്ങിയത്. ജനപ്രിയ ഇനങ്ങളായ തിരുവാതിരക്കളി, മിമിക്രി, മാർഗംകളി, നാടൻപാട്ട്, നാടകം എന്നിവ നടന്ന വേദികൾക്കു മുന്നിൽ വൻ ജനക്കൂട്ടമാണ് കാഴ്ചക്കാരായി എത്തിയത്. ഇരിപ്പിടങ്ങൾ നിറഞ്ഞതോടെ പലരും മണിക്കൂറുകളോളം നിന്നാണ് മത്സരങ്ങൾ വീക്ഷിച്ചത്. വർഷങ്ങൾക്കുശേഷം വിരുന്നെത്തിയ കലോത്സവത്തെ തൃശൂരുകാർ നെഞ്ചേറ്റുന്ന കാഴ്ചയാണ് ഞായറാഴ്ച കണ്ടത്.