ഗവ. കരാറുകാർ മാർച്ച് നടത്തി

തൃശൂർ: ട്രഷറി നിയന്ത്രണം പിൻവലിക്കണമെന്നും നിർമാണ മേഖലയിലെ പ്രതിസന്ധി തരണം ചെയ്യാൻ സർക്കാർ അടിയന്തരമായി ഇടപെടണമെന്നാവശ്യപ്പെട്ട് ഗവ. കോൺട്രാക്ടേഴ്സ് അസോസിയേഷൻ ജില്ല ആസ്ഥാനങ്ങളിൽ മാർച്ച് നടത്തി. ചെമ്പൂക്കാവ് മിനി സിവിൽ സ്റ്റേഷന് മുന്നിൽ നടന്ന മാർച്ച് ജനറൽ സെക്രട്ടറി സണ്ണി ചെന്നിക്കര ഉദ്ഘാടനം ചെയ്തു. ക്വാറി ഉൽപന്നങ്ങൾക്ക് അന്യായമായി നിരക്ക് വർധിപ്പിച്ച നടപടി പിൻവലിക്കണമെന്ന് അദ്ദേഹം ആവശ്യപ്പെട്ടു. ജില്ല പ്രസിഡൻറ് എം.കെ. രാജൻ അധ്യക്ഷത വഹിച്ചു. സംസ്ഥാന വൈസ് പ്രസിഡൻറ് എം.കെ. ഷാജഹാൻ മുഖ്യപ്രഭാഷണം നടത്തി. കെ. മനോജ്കുമാർ, പാവു ജോസഫ്, യു.എൻ. രാമചന്ദ്രൻ, ജോയ് ജോൺ പറപ്പിള്ളി, ടി.എ.മൂസ, കെ.ഡി. ബിജു തുടങ്ങിയവർ സംസാരിച്ചു.