സിവിൽ സ്​റ്റേഷൻ റോഡ്​ ടാർ ചെയ്​തില്ല; മേയറുടെ ചേംബറിന് മുന്നിൽ കൗൺസിലറുടെ കുത്തിയിരിപ്പ്

തൃശൂർ: സിവിൽ സ്്റ്റേഷൻ റോഡ് ടാർ ചെയ്യാത്തതിൽ പ്രതിഷേധിച്ച് കോൺഗ്രസ് കൗൺസിലർ എ. പ്രസാദ് മേയറുടെ ചേംബറിന് മുന്നിൽ കുത്തിയിരിപ്പ് സമരം നടത്തി. ഉച്ചയോടെ തുടങ്ങിയ സമരം വൈകീട്ട് അഞ്ചരയോടെയാണ് അവസാനിപ്പിച്ചത്. കഴിഞ്ഞ വർഷം കൗൺസിൽ അംഗീകരിച്ച 27.75 ലക്ഷം രൂപയുടെ പ്രവൃത്തികളാണ് ഇനിയും നടപ്പാക്കാത്തത്. ടാർ ലഭിക്കാത്തതാണ് കാരണമെന്ന് പൊതുമരാമത്ത് വിഭാഗം പറയുന്നു. എഴ് മാസമായി റോഡ് നിർമാണത്തിനുള്ള മെറ്റൽ റോഡിൽ ഇറക്കിയിട്ടതു മൂലം ഗതാഗതതടസ്സവും വാഹനാപകടവും ഉണ്ടാകുന്നു. മേയർക്ക് നിരവധി കത്ത് നൽകിയെങ്കിലും തീരുമാനമുണ്ടാവാത്തതിലാണ് സമരം. അസി.എക്സിക്യൂട്ടീവ് എൻജിനീയർ ടാർ ചൊവ്വാഴ്ച അനുവദിക്കാമെന്ന് ഉറപ്പ് നൽകിയതിനെ തുടർന്ന് സമരം അവസാനിപ്പിച്ചു.