പുത്തൂർ ബാങ്ക്​ ക്രമക്കേട്​: മുൻ സെക്രട്ടറിയിൽനിന്നും ഭരണസമിതി അംഗങ്ങളിൽനിന്നും നഷ്​ടം ഇൗടാക്കാൻ ഉത്തരവ​്​

തൃശൂർ: വൻ ക്രമക്കേട് കണ്ടെത്തിയ പുത്തൂര്‍ സര്‍വീസ് സഹകരണ ബാങ്കിലെ മുൻ ഭരണസമിതി അംഗങ്ങൾക്കും അക്കാലയളവിലെ സെക്രട്ടറിക്കുമെതിരെ സഹകരണ വകുപ്പി​െൻറ നടപടി. ബാങ്കിനുണ്ടായ നഷ്ടം ഇവരിൽനിന്ന് ഇൗടാക്കാനാണ് ഉത്തരവ്. 1999 മുതൽ 2014 വരെയുള്ള ഭരണസമിതി അംഗങ്ങൾ, ആ കാലയളവിെല സെക്രട്ടറി എന്നിവരിൽനിന്ന് സഹകരണ നിയമം വകുപ്പ് 68 (രണ്ട്) അനുസരിച്ച് നഷ്ടം ഇൗടാക്കാൻ ജോയൻറ് രജിസ്ട്രാറാണ് ഉത്തരവിട്ടത്. ബാങ്കിൽ ക്രമക്കേട് ആരോപിച്ച് ബാങ്ക് അംഗങ്ങൾ നൽകിയ പരാതിയിലായിരുന്നു ജോയൻറ് രജിസ്ട്രാറുടെ അന്വേഷണം. കോണ്‍ഗ്രസ് മണ്ഡലം പ്രസിഡൻറ് സുരേഷ് കാക്കനാട് പ്രസിഡൻറായിരുന്ന അന്നത്തെ ഭരണസമിതിയിൽ കെ.കെ. പുരുഷോത്തമനായിരുന്നു സെക്രട്ടറി. വെട്ടിപ്പുകളില്‍ ഭരണസമിതി അംഗങ്ങള്‍ക്ക് പങ്കുള്ളതായി കണ്ടെത്തിയതിനെ തുടർന്ന് ഇവരെ അയോഗ്യരാക്കിയിരുന്നു. ബാങ്കി​െൻറ സ്വത്തും ആസ്തിയും ദുർവിനിയോഗം ചെയ്ത് സ്വാർഥ താൽപര്യങ്ങൾക്ക് ഉപയോഗിക്കുകയും സഹകരണ നിയമത്തിന് എതിരായി പ്രവർത്തിക്കുകയും ചെയ്തുവെന്നതാണ് ഇവർക്കെതിരായ കുറ്റാരോപണം.